油災
2014/11/28 09:11:57
網誌分類: 經濟
昨日係感恩節，美股休市，但油價有災。沙特阿拉伯在油組(OPEC)舉會議前夕表明，相信油價最終會自行穩定下來，它不會推動油組減產，雖然有成員國呼籲減產以支撐價格，但大部份成員國都認為沒有必要減產。油組減產無望，紐約期油急跌，再創4年新低，最新報68.56美元，大插6.98%；天然氣亦大插3.4%，報4.205美元。
油價失控下跌，中海油(883)
、中石油(857)受打擊最大，今日都要面對急插。佢地在油價高時做咗不少投資，如今面對大幅減值風險。而燃氣價近排反彈，令氣股有較好的支持，但昨日氣價都受油價拖累大跌，氣股亦唔掂。油價雖然跌得急，但未跌定，我估明年要見50美元才見底，中長線投資者不要太急入油股。現況對我一路睇好的國泰(293)這類航空股有利，但不宜高追，可等回吐時就買。 美股今上日收市再創歷史新高。截至上日，標普500指數已經係第47次創收市新高紀錄，而杜指亦係第30次。如果講升幅，又唔係好大，標普500指數今年累積升幅12%，杜指比較弱，累積升幅8%，所以用蝸牛式爬升來形容美股都幾貼切，至於後市又係點呢？
彭博社昨日統計了美國八大行分析師對明年美股目標的預測，據他們的估計，大市走勢仲悶過今年。預期美股明年仲會造好，但估計上升空間有限。其中瑞信、高盛及巴克萊預測標普500指數明年年底目標價2100點，升幅較昨日收市唔夠30點！即係1%多啲。而睇得最牛係奧本海默的John Stoltzfus，都係只有2311點，升幅都係只有11%。
自聯儲局在2012年12月底推出QE3，標普500指數由當時大約1400點升到上日2073點，已經勁升接近50%！美股市值佔全球股市市值比重亦大幅攀升，由32%升至37.3% 。雖然美股呢段時間升得咁勁，但由於大市好似蝸牛咁爬升，除咗今年10月中有少少似樣咁調整，一路係上升，即使係好友，但位高勢危，都想等大市回一回至買，結果一路等，大市一路升，結果好多人都係得個睇字，賺唔到個升幅，期間都好痛苦也。
美國結束QE，但聯儲局加息無期，加上全球央行包括中國、歐洲及日本，又開始大放水，熱錢又再橫流，水漲船高，分析員唔敢睇淡，但見到美股已經升得咁高，又唔敢睇得太好，結論就係睇牛皮靠穩，美股繼續蝸牛式向上爬啦。
近期比較搶眼的是中國股市，據FT(Financial Times)報導，中國經濟總量於2010年超過日本，成為美國之後的世界第二大經濟體。昨日，中國股市市值亦終於贏埋日本，中國股市以昨日收市市值接近4.5萬億美元，而日本股市下滑至4.478萬億美元。日本股市近幾個月都有反彈，今年上漲近7%，但日圓貶值咗11.4%。如果用美元買日本股票，倒蝕4%。估計隨著滬港通通車，國際投資者可以直接買上海股市的股票，中國股市規模將會不斷拋離日股，直追美股。
比起美股，上證綜指今年認真威感，累計升幅24%。借住滬港通消息的推動，上證綜指由10月下旬開始至上日收市，就大升咗14.5%。上周末，人行意外地宣佈兩年以來首次減息，讓人猜測，隨着中國經濟降溫，當局會採取進一步措施提振經濟。中國股票將繼續反彈。睇嚟來年買中國股票比美股勝算會大啲。
陸羽仁
回應(5) 我想回應
陸羽仁 BLOG 舊文
