好了傷疤勿忘痛
2014年11月28日
內地財金部門繼續出招，人民銀行上周減息後，今早更進一步暫停正回購操作，為四個月來首次，本周淨投放350億人仔入市場，內地上證指數六連升，不過港股仲係維持弱過內地嘅表現，調整咗過百點。
內銀唔係困擾全消
市場焦點係中資金融受惠內地減息，成為贏家，除咗內險股外，內銀股彈吓彈吓，個別都創咗今年高位，即係今年買入呢啲股份嘅股民，?家都有錢贏。有中環茶友笑言，年中內銀股被外資唱淡，股價係咁插，?家因為A股向好受捧，大家又開心埋位炒炒吓，證明股民對內銀股係好了傷疤忘了痛。
昨日創咗今年高位嘅內銀股有中行(3988) 同交行(3328) ，當然佢哋唔係真係咁叻，可以喺指數未創新高下升上今年高價位，主要係年頭佢被人睇得太淡，股價幾唔靚仔，?家內地金融股份有炒作，大家一擁而上，有小小時勢造英雄的味道。茶友話，內地金融機構特別係銀行，都仲係有呆壞帳問題，仲要直接面對資本率問題，無論內險同內銀好多都有籌集股本壓力，佢哋有啲要發優先股集資，有啲要減低派息比率，只不過因為?家氣氛好，大家就將負面因素放埋一邊。
其實，市場有唔少呢啲醒目錢，所以內銀股昨日高開後，部份已經倒跌收市，好似建行(939) 倒跌0.69%，比較強嘅國壽(2628) 收報27元，升幅收窄到0.75%。
陸羽仁對於揀股買股，從來係用相對論，即係股價同業務比係咪抵買，所以唔係好有興趣買高PE股，因為覺得佢哋已經反映咗美好一面，除非佢哋有大部份睇唔到嘅潛力，否則就唔考慮。同一道理，醜股如果價錢夠平，業務有一定基礎，咁都可以諗，上半年嘅內銀股就屬於呢一類，所以我時時都話唔使見淡唱淡，平就可以入啲，貴就可以沽啲，尤其佢哋有派息墊底，所以低位不妨入啲，?家佢啲高升，高位自然又有彈藥可以等機會食吓胡。
短炒新股要守紀律
新股市場呢排好熱鬧。今日內地教育機構楓葉教育(1317) 掛牌，在暗盤市場新報3.11元，較招股價2.88元，高8%。該股錄得非常大幅超額認購，接獲13635份申請，共認購65億股，相當於超額認購194倍；國際配售亦錄得大幅超額認購。一手中籤比率50.05%，認購15手才可穩獲一手。
值得一講嘅係本地日本旅行團營運商東瀛遊(6882) 暗盤一度報1.3元，較招股價1.39元低近6.%，今日上市表現難料。該股發行1.25億股，是次招股接獲10140份申請，共認購13億股，相當於超額認購103倍；國際配售同樣獲非常大幅超額認購。一手中籤比率5.05%，認購30手才可穩獲一手。喺咁情況下若然上市無錢賺甚至破底，股民真係有啲唔抵，不過，呢啲短炒嘅新股必須抱多啲嚟密啲手嘅宗旨做人，有理無理要定好食胡時間就要沽。東瀛遊優點係食正日圓大跌浪，唔好處亦係呢類好日子唔係年年有，公司揀咗係最好時間上市，未來唔係咁易博有更好經營環境，所以揸咗貨者如果本來諗住短炒，就唔好因為無錢賺變長揸。
陸羽仁
金融High Tea 舊文
