中環在線：富三代今年至搶鏡
■一身肌肉嘅吳宗權，今年著桃紅色泳褲喺沙灘淋冰，好養眼。 《壹週刊》圖片 
話咁快就到咗2014年最後一日，要講金融八卦料，今年肯定係富二、三代搶曬鏡嘅一年，唔少家族企業陸續安排畢業冇耐、廿幾三十歲嘅二、三代出嚟學做生意，華華要認識嘅新面孔越來越多，不過佢哋大部份都仲係怕怕醜醜咁，希望佢哋新嘅一年越來越有大將之風喇。
今年我至濕 吳宗權
大家仲記唔記得今年暑假興起為肌萎性脊髓側索硬化症（ALS）病人組織籌款嘅冰桶挑戰？一時間，多位政商界名人又找數、又挑戰人淋冰水，好不熱鬧。商界名人當中，淋冰水淋得最養眼嘅，當然係九倉（004）主席吳光正個仔吳宗權喇。
35歲嘅吳宗權生得高大威猛，出名熱愛水上活動，2006年曾代表香港參加多哈亞運會嘅水球比賽，佢一身肌肉加埋健康膚色，喺富二、三代型仔榜排名數一數二。佢今年暑假就曾經著住桃紅色泳褲喺沙灘找數，養眼指數爆燈！
■（左起）郭基煇、黃永耀及黃永龍皆是城中筍盤。 今年我至筍 郭基煇 黃永耀 黃永龍
每年樂壇頒獎禮都有最佳新人獎，如果財經界都有嘅話，今年最佳新人應該係新地（016）大股東郭炳江嘅31歲乖仔郭基煇（Adam）。聖誕節前，郭炳江喺新地貪汙案中被判入獄5年，平日少見傳媒嘅Adam，隨即不停被傳媒追訪，難得佢每次都可以表現淡定，對答得體、有禮，值得畀個讚佢。
本港另一大地產商信和置業（083）嘅幾位太子爺亦陸續亮相，市場之前主要認識信置主席黃志祥嘅大公子黃永光，黃永光上個月就帶埋兩個細佬黃永龍同黃永耀去信置有份發展嘅新盤售樓處。26歲嘅黃永龍係黃志祥二仔，喺美國哥倫比亞大學修讀歷史，早兩年畢業回港加入公司，佢同黃永耀官仔骨骨，輕易成為城中筍盤喇。
■邱詠筠早排減肥，成功瘦咗一個圈。 資料圖片 今年我至fit 邱詠筠
富二、三代當中，邱德根孫女、帝盛酒店（2266）太子女邱詠筠（Winnie）出名係靚女，佢今年喺阿爸邱達昌介紹下食減肥餐單，成功瘦咗一個圈，早前信心十足，著上一襲紅色晚裝現身籌款舞會，身材玲瓏浮凸，成條美人魚一樣。不過話時話，同一個場合，佢又係一身紅色，梁太又係一身紅色，點解一個似美人魚，一個似龍蝦㗎呢？
■49歲嘅陳智思呢身肌肉，令唔少女士睇到嘩嘩聲。 資料圖片 今年我至肌 陳智思
行政會議成員陳智思9月參加百萬泳，被人拍低呢張曬肌照，令唔少女士睇到嘩嘩聲，男士就羨慕到不得了，49歲都keep到呢身肌肉，真係唔係人人做到㗎。
陳智思唔係專登操肌，只係因為年輕時患過罕有嘅血管收縮病症高安氏動脈炎，做過多次手術，所以一向重視健康，注意飲食。佢廿年前已經戒食紅肉，只食白烚或蒸煮嘅雞、魚、蝦，仲要每朝晨早5、6點起身做運動。所以話呢，各有前因莫羨人！
■曾俊華（左）被人惡搞變咗「品客爺爺」（右），但好可愛。 今年我至cute 曾俊華
財爺曾俊華一向有個花名叫做鬍鬚曾，襯番佢嘅鬍鬚造型，今年佢就多一個花名叫「品客爺爺」。事緣財爺喺雨傘運動期間出訪英國，當地有學生喺facebook整咗個專頁「歡迎」佢，專頁上面加咗個品客薯片嘅招牌鬍鬚公仔，再加工，效果出奇地似財爺，仲要好鬼可愛㖭。花名多少反映當事人嘅形象，財爺得到呢個花名應該還得神落。
■王瑤之前經常唔覺意騷身材（左圖），但今年環球信貸搞上市就包到實一實（右圖）。 資料圖片 今年我至密 王瑤
今年最估佢唔到嘅，應該係環球信貸（1669）嗰位31歲嘅靚女老闆娘王瑤，佢係公司生招牌，以往幾乎每次現身都唔覺意露少少性感底線，最近搞上市竟然一改形象，著衫包到實一實，差在未著埋樽領咋。
今年我至靚
係咪靚女呢家嘢真係好主觀，所以要講今年最靚嘅「中環我至靚」，客觀啲都係要睇點擊率，綜觀全年點擊率最高就係7月尾見報嘅呢位超短褲靚女，有6.57萬個點擊，排第二都係4.4萬。查實靚女相呢家嘢，最重要都係角度、角度同埋角度！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
