智取大市：穩守突擊迎2015
如果覺得2014年股市難賺錢，唔好意思，2015年或許更加難，因為科網股、濠賭股、中資金融股、細價股喺2014年都炒過曬，剩番落嚟大部份係老弱殘兵，要喺2014年未炒過嘅股票裏面搵下一批翻身強勢股，又要避免買中繼續輸錢嘅衰股，機會率肯定少過一半。
四個錦囊傍身
應付可能更加難炒嘅2015年，晉佳認為，要自備一套攻守兼備嘅策略傍身，2015年策略重點係穩守突擊，求勝之前，先要保住唔輸。以下四個錦囊，希望可以幫大家提升攻守能力。
第一，改變長線投資嘅觀念。近幾年港股炒作板塊越炒越窄，上升嘅板塊通常多唔過下跌板塊，去到2015年，呢個情況可能更加惡化。作為一名普遍散戶，根據所謂基本分析去長揸一隻股票，已經同入投注站買馬冇分別。
針對呢種市況，無謂對股票過份長情，捱價超過一個月嘅股票，基本上一定要沽出，策略上只持有一直賬面賺錢嘅股票，咁樣可以減少出錯機會。
第二，靈活調節現金水平。金融市場太多不尋常發展，美股連番創新高，內地A股散戶炒到癲曬，絕不能排除2015年出現洗牌格局。作為資金有限、進出靈活嘅散戶投資者，毋須嚇嚇同股票鬥長命。要避險時，毋須介意現金多過股票；要進取之時，亦毋須介意買到現金所餘無幾，咁樣就可以減少捱棍機會，增加防守力。
第三，注碼只適宜集中一至兩個板塊。以近排為例，右手揸中資金融股，左手揸基建股，已經贏成條街。反正分散投資會分薄回報，但又唔代表能夠分散風險，點解唔將資金集中放喺一兩個強勢籃子，提升進攻力？
第四，等跌市分辦強勢股。近兩年強勢股特徵係升市升到癲，跌市唔肯跌，買強勢股，不妨喺跌市時股價唔肯跌先買，而唔係升市高追等坐艇。要喺跌市時同時應用第二個避險錦囊同第四個撈強勢股錦囊，重點係，跌市只買強勢股。
2015年要贏錢，同2014年技巧差唔多，轉身要快，但仲要加多一樣技巧，就係要有避險的能力，因為股票越嚟越貴，黑天鵝出現機會就越嚟越高。講番大市，噚日內地滬綜指喺高位徘徊，埋單跌兩點，但整體大市簡直兩極化得可怕，金融股可以升6%至7%，非金融股就跌到同股災冇分別。至於港股比人弱，中資金融股都升唔起，成個市自然要跌。
晉佳
http://www.facebook.com/pages/晉佳/719009541518415
本欄逢周三刊登
晉佳
智取大市 - 晉佳 舊文
