一周三件：中國風電可諗
■劉順興任主席的中國風電，食正內地風電需求大增，前景看俏。 資料圖片
中國風電（182）喺今年頭開始到家陣，就質咗50%，現價仲要低過集團引入大孖沙華電褔新（816）時嘅配股價，兼有得炒盈喜，有得諗。
中國風電上年尾配售8.8億股（或9.8%）引入華電褔新，喺當時，每股作價係0.43元，中國風電由9月開始調整，現價（0.405元）比起1月時高位0.84元，足足跌咗50%，平過華電褔新入股價，PB得0.7倍，喺有盈利增長嘅再生能源股中，PB係至抵搞之一。而華電褔新承配後，係一股都冇沽過，以行動實證佢哋嘅信心。
食正內地風電熱
事實上，中國風電亦交到成績，今年上半年盈利1.22億元，一支箭飆升咗逾兩倍，兼幾乎追到上年全年盈利1.5億元。再講，中國風電唔係好似部份環保股，盈利增長係靠補貼，集團嘅再生能源工程、設計同製造瓣數，表現相當突出，帶動增長。而喺下半年，風電設備生產回暖，中國風電喺嚟緊全年度嘅成績單，應該有得博盈喜。
啱啱喺上一次主打華電褔新時講過，祖國目標2020年時，全國風電裝機容量要倍翻到2億千瓦，中國風電呢一瓣，已經食到應一應。又根據國際能源署發佈，喺2035年前，全球為咗應付能源嘅需求，呢瓣投資嘅總金額，係逾300萬億元，每年投資基準，要由家陣嘅12.5萬億元，增加去到16萬億元。而單係祖國，就要新增1,400吉瓦，當中，佔咗近40%，係風力能同太陽能發電。
睇到嘅係，再生能源唔係去到2020年就叫停，而係有持續性同根本嘅需要，中國風電會繼續長食長有。買中國風電，當上番NAV0.6元，係講緊要升46%，PB先得1倍，其他行家PB，閒閒哋1.5倍或樓上，中國風電至抵博。
錢雋
細價股專家
本欄逢周二、三、五刊出
錢雋
一周三件 - 錢雋 舊文
