魚樂無窮：股市大贏家如何煉成
■呢輪A股升到七彩，要幾癲有幾癲。 資料圖片
上回講到，今年咁難炒，出年咪仲大鑊？回帶睇番，近年原來年底悲觀，翌年通常都有驚喜，最經典例子係2011年，恒指全年累積跌達兩成，全城睇淡2012年投資環境，但喺環球泵水下，恒指埋單升逾兩成。大家覺得今年難炒，出年話唔定有驚喜！
想問我恒指出年睇升幾多？唔好意思，柴我台都唔會估。恒指代表性大不如前，加上炒股不炒市乃新常態，指數唔鬱只要捉中板塊，一樣可以贏到開巷，估嚟都冇意思。識估一定估滬綜指，起碼作用大過恒指，一句講曬，社科院睇5000點，我打八折睇4000點。幾時到站？出年第一季隨時到。
其實想再誇張啲，講1月就會見到，但保守起見，畀夠三個月佢，然後就會喺3300至3800點上落。咁有信心一季搞掂？人哋講緊慢牛喎。老老實實，呢輪A股升到七彩，要幾癲有幾癲，速戰速決才是王道。
講到炒股策略，好簡單，四粒字︰順勢而行。唔好諗住做一年炒股大計，而家個市，一日幾個浪，幾日一主題，轉身慢啲都俾人偷襲，做季度預測都未必準，做全年預測更加係自欺欺人。短線睇，近排都係中資股主導，內銀、內險、券商、內房、基建輪流炒，每樣揸番隻，下個月有肉食，唔想煩？一注獨贏A股ETF吧。
唐牛
https://www.facebook.com/tongcow88
唐牛
魚樂無窮 - 唐牛 舊文
