中環在線：歐智華擢升戰友
統領滙控人事部
■歐智華（上）好賞識高沛賢，喺滙控坐正後即call佢回巢。 設計圖片
滙控（005）近期有唔少意料之外嘅人事調升，除早前公佈滙豐中國一姐黃碧娟，升任大中華一姐外，掌管集團環球企業傳訊主管、行政總裁歐智華嘅親密戰友高沛賢（Pierre Goad），據聞今年1月初，已正式調任集團環球人力資源主管，接替退休嘅A.Almeida，Pierre由公關阿頭轉做HR阿頭，都算係創獅子行先河。
高沛賢兼任公關阿頭
Pierre嘅新職位麾下團隊，由原本企業傳訊部四百幾人，擴大幾倍，去到一萬幾千人，加上人力資源統領滙控全球二十五萬員工嘅人事佈局同埋升遷，Pierre當然位高權重。
佢現時身兼滙豐集團總經理，而Almeida退休前另一頂帽，係滙控集團常務總監，知情者相信，Pierre被委任為常務總監乃遲早安排。
Pierre調職，喺去年底透過行方內部通訊發出，公告指過渡期內，Pierre兼任企業傳訊主管，日後接班人亦會「私下向佢滙報」，換言之，集團公關事務繼續會關佢事。
Pierre財記出身，曾任職《亞洲華爾街日報》，後獲歐智華賞識，羅致為亞太區炒房同埋投行公關主管，自此成為歐氏愛將。
雖然佢喺2010年，曾短暫跳槽至蘇黎世金融集團任環球企業傳訊主管，但宮廷政變後坐正做行政總裁嘅歐智華，即吹鷄call佢回巢，翌年Pierre擔任滙控企業傳訊聯席主管。2012年集團面對美國洗黑指控時，Pierre更重操故業充當記者，協助歐智華拍製解畫短片，好幫到手。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
