商品股逐瓣冧
2015年01月15日
特首發表《施政報告》，結果同陸羽仁收到的風一致，政治上多嘢講，樓市無大嘢，幾個舉措都唔算係大動作，主要都係將啲公屋轉居屋出售，同埋繼續增加推地。個市午後回落，相信主要係同內地A股偏軟有關。
政府無在樓市再落重藥，要留意反而係《施政報告》話，足夠及優質的人力資源是香港社會和經濟持續發展的首要條件，卻推算香港的勞動人口預期於2018年左右開始下降，相關決策局已制定全面政策回應。人口增長先能夠創造經濟活動，如果人口增長放緩甚至回落，對樓市股市都無好處，2018年好快就到，特首啲招數靈唔靈好快就有答案嘞。
A股要調整尋底
另外一件事同股市有少少關係就係唔聲唔聲就停咗投資移民。過去已經唔畀買樓移民，香港人好識搵食，就衍生出有啲莊家叫內地人買股移民，批啲貨畀想移民的人坐住，接貨者買貴咗都無所謂，坐貨成本當做買個香港身份證的價錢，家突然叫停，呢條米路又斷埋。
今日港股先升後回，因為內地股市跌0.4%，講到港股跟A股嘅關係，有中環茶友問，今個星期A股好似無復氣勢喎？我覺得內地股市家處於一個小調整期，唔講內地股市喺上年第四季勁升，單係計新年後幾個交易日，都已經爆上唔少，家個市去番獲利回吐階段，可能上證綜指要見番三千一百點打打底都唔奇。至於港股，呢排就跟內地股市走，多過跟外圍，昨日個市午後乏力，相信都係呢個情況。
A股調整的近因，市場歸咎有十隻新股一齊發行，是次IPO申購潮中最多的一日，令市場資金減少。本來，昨日早上受惠市傳人民銀行續做2800億元人民幣MLF，滬深兩市高開，後來借擔心新股發行抽走資金回吐，變成倒跌。上證指數收報3222點，跌12點；深成指收報11237點，跌118點，帶住港股回落。
不過傳電力改革已獲國務院會議原則通過，呢輪升得已經唔錯嘅電力股造好，華電國際(1071) 升6.5%，為港股通表現第二好股份。恒指跟住內地低收，報24112點，跌103點；國企指數收報12008點，跌54點，成交861億元。
金屬商品股慘跌
各類股份以金屬生產商跌得最傷。油價跌，生產性金屬都無運行，倫敦銅價跌穿每噸5400美元關口，三個月銅價亞洲盤插8.7%，跌幅為六年最勁，累及江銅(358) 急瀉，收報12.82元，跌5.9%，表現為國企指數成份股最差；持有金銅礦的紫金(2899) 也降5.7%。至於嘉能可(805) 尾市沽壓大增，收造30.5元，瀉近9%。鋼鐵股亦受壓，馬鋼(323) 插6.6%，鞍鋼(347) 挫3.5%。
金屬商品跌價拖低相關股票，係同油價回落一脈相承，都係源自美元轉強，以及工業需求不振，在通縮威脅下，資金退出商品市場，造成佢哋價格逐瓣冧。唔同類型商品股中，好似貿易商嘉能可呢類風險最高，因為市場風高浪急，大生大死，一企錯邊好易就打柴！加上商品唔好市，交易及市場活動大減，不利交易商。
能源商品跌價，用家就變成贏家。電力股最近炒作源於成本下降，加上炒作電力改革。不過，瑞信呢個時候卻發表報告，認為華能(902) 估值不吸引，維持「跑輸大市」評級，但目價價由7.5元升至8.6元，以反映受惠減息影響。
瑞信報告話，華能過往獲得母公司注入資產，大部份均位於內陸，面對沿海地區受到再生能源競爭，華能將會受到影響，又指母公司現有錄得盈利資產不多，再獲注入資產機會有限。該行認為，華能預測市帳率達1.6倍，是該股五年最高水平，加上估計股本回報率下調，料難以支持現價咁話。
陸羽仁
金融High Tea 舊文
