油價挾倉
2015/01/15 09:26:03
網誌分類: 經濟
昨日股市可以講係全球盡墨。跌浪由亞洲傳到歐洲，再到北美。美股更係連續第四日下挫，跌幅更有一日大過一日的勢頭。杜指昨日下年一度勁跌近350點，全賴國際油價強勁反彈，帶動能源股反彈，讓美股尾市跌幅大幅收窄，杜指收市仍跌187點至17427點，跌幅超過1%；標普500指數跌12點，收報2011點，跌幅0.6%；納指跌22點，收報4639點，跌幅0.5。
世界銀行將今年全球經濟增速預測，由3.4%下調至3%。而銅價暴跌超過5%至超過5年新低，進一步增加投資者對全球經濟唔掂嘅憂慮，股市恐指標VIX指數繼續上升至21.5的水平，三日內已跳升超過25%。先係歐股唔得，然後是美股唔掂，其中金融與原材料板塊更係跌市災區。幸運嘅係市場對歐元區如期推出量化寬鬆（QE）的期望因為有消息指法院將批准QE的推出而升溫，再加上紐約期油強力反彈，重上每桶48美元上方，頂住歐股及美股嘅跌勢。
紐約期油收48.48美元，大升5.6%，市場將油價上升歸因兩個因素，第一是美元走弱有利油價反彈。第二是昨天是英國布蘭特原油2月期權到期日，而今天是美國原油期權到期油，油價突然炒高有挾倉味道，好倉一抽上平埋倉，淡友無仇報。油價上升，帶動氣價亦大升10%。
另外美國聯儲局昨日公佈有關美國經濟狀況的「褐皮書」，報告指稱，全美經濟活動在11月中旬到12月底之期間繼續擴張，大部份地方地報稱經濟有「溫和」或「適度」的增長。雖然美國經濟狀況正在改善，但聯儲局官員對原油價格大跌將對美國經濟造成什麼樣的的影響，感到擔心。而另一個備受官員關注的地方是就業況狀。美國失業率持續改善，但平均工資未見相應的回升，咁多個行業之中，出現工資上升壓力的是「限於擁有專門技術技的勞工」。
市場此前的分析係國際油價在年內暴跌，令到美國人消費能力大升，係另一個變相的QE，不過昨日出爐的12月零售額較上月大幅下滑0.9%，就令好多分析大跌眼鏡，令人對能源價格大跌，究竟對零售以至整個經濟係有利抑或有害，產生疑惑。尤其係12月通常係零售業最為繁忙的月份，多數零售店的銷售卻出乎意料的疲軟。
據資對顯示，0.9%的環比跌幅係近一年來最大嘅，12月的汽油零售額因油價大跌之故，銷售額較上月暴跌6.5%，跌幅係2008年以來最高的。與此同時，汽車零售下降0.7%。如果唔計汽車和汽油零售，12月的零售額依然較上月下跌0.3%，差過市場預期嘅增長0.3%至0.5%。如果計算整個2014年，美國的整體零售額僅增4.0%，漲幅是5年多以前美國經濟開始復甦以來最低的。不過，如果不計汽油，年度增長率為4.8%，增長狀況還算相對健康。
據我估計，能源價格暴跌，令美國人今年多在能源消費上慳咗140億美元，對其餘的消費理應鬆手咗，不過總體零售額未有顯著上升，主要原因能源係生產的主要成本，汽油以外，其他商品嘅成本降低咗，再加上美元強勁，年內升幅都唔細，進口產品相對又平咗，再加上美國人工資沒有增長，七除八扣，令整體零售額，特別係下半年唔見顯著增長，又可理解啦。
拖累大市的另一個原因係摩根大通公布嘅第四季財利潤與銷售額，都低過預期，股價勁挫超過3.5%，係表現最差嘅杜指成份股，令到杜指跑輸大市。
美股還在下調試底，有分析杜指要試一試17000點的大位，仲有400點左右向下水位。
陸羽仁
回應(2) 我想回應
陸羽仁 BLOG 舊文
