魚樂無窮：大市難搵食有何對策
■美股學A股港女化，高低波幅超過四百點。 資料圖片
周二晚見到美股又坐火箭，寧舍好瞓，點知一覺醒來，原來係惡夢嘅開始。美股好學唔學，學A股港女化，高低波幅超過四百點，港股破關乏力，慘！講明係惡夢，衰嘢當然係接二連三，成交雖然有近九百億元，但炒作概念其實少之有少，極其量只有升幅榜中嘅殼股，以及受惠施政報告嘅建築股，前者你唔敢買得多，後者升幅唔算多，一句講曬︰冇肉食！
同戰友傾開，今年開局係近幾年最艱難嘅一年，舊年初有科網股炒到癲，前年就因為美國財政懸崖最後一刻終於解決，引發大規模挾淡倉行動，只要肯落場，肯定有份印銀紙。今年呢？除咗第一日受惠A股炒咗一轉之後，其餘時間都乏善可陳。無計，A股近排打新一浪接一浪，加上孖展融資降溫，五級火已經變成慢火，港股舊年底靠中資股搞旺個場，自然要跟住半場休息。
面對如此市況，最緊要保持冷靜。用打麻將做比喻，手牌弱就要守，最緊要唔好出沖，皆因食埋食埋都唔夠輸一鋪大牌，炒股一樣，見鬱少少就衝，事關隨時踩中陷阱，假突破在弱市多的是，學股神話齋，炒股第一規條係唔好輸錢，第二規條係唔好忘記第一條。輸錢都唔緊要，最大鑊係輸信心，到時新升浪嚟到，你就會因為輸到怕唔敢入市，眼白白睇住人哋贏錢，共勉之！
唐牛
https://www.facebook.com/tongcow88
唐牛
魚樂無窮 - 唐牛 舊文
