魚樂無窮：零售股幾時先可撈底
■零售股莎莎最新零售數字並不理想。 資料圖片
大陸二○○八年四萬億救市，導致資源行業嚴重產能過剩，至今仍未解決，相關股份同當年高位比，依然差幾丈遠。其實香港都有同樣情況，講緊邊個行業？零售是也！
曾幾何時，零售股乃炒鬼最愛，皆因自由行消費力無極限，個餅越做越大，估值沒有最高只有更高。銅鑼灣及旺角三步一金舖、兩步一藥房，還有無數嘅化妝品舖。旺區老牌食肆買少見少，彷彿金條奶粉可以當飯食。當然業主也不是省油嘅燈，見你搵銀搵到咁過癮，梗係瘋狂加租，零售利錢越來越少。最大鑊係中央打貪不遺餘力，以往送禮當食生菜日子不復見，連生意都少埋，真係年初四咁嘅樣。
時至今日，零售股普遍較高位唔見一半，行業龍頭如莎莎（178）、周大福（1929）公佈最新零售數字亦肉酸非常，幾時先係入市時機？可從上述兩個重點出發。第一，舖租。根據市場數據，零售舖租已喺二○一三年見頂，以租約兩年計，即係最快今年可以重新訂立租約，吉舖處處下，相信舖租壓力可以舒緩。第二，銷售。呢個係基數問題，間間公司唔同，化繁為簡，只要同店銷售回復增長，就算唔係復蘇，都肯定見咗底。可以預期，數據改善最快今年全年業績反映，即係明年春天，假設股價行先三個月至半年。數數手指，買貨時機大約在冬季！
唐牛
https://www.facebook.com/tongcow88
唐牛
魚樂無窮 - 唐牛 舊文
