一石二鳥
2015年01月21日
內地股市上演慘劇式暴跌後快速反彈。內地全年經濟增長不達標，得7.4%，略低於年初7.5%的增長目標，但大家早就估到，所以無影響深滬兩市回升。
滬市曾漲逾2%，午後一度掉頭向下，上證指數收報3173點，漲56點，深成指收報10996點，漲225點。兩市成交金額7100億元人民幣。
不過，個市震盪咁大，唔好預佢會咁快爆上，想買貨可以買住少少，再候回吐時入貨，高追始終要小心。
慘劇帶來心理創傷
跟隨內地股市前日暴跌7.7%後反彈，港股全日彈逾兩百點，恒生指數收報23951點，升212點；國企指數收報11741點，升265點，成交明顯縮減，只有885億元，反映觀望氣氛幾濃。
在慘劇日大跌嘅中信證券(6030) 回升番5.9%，造25元。另一類急跌股內險都彈唔少，國壽(2628) 漲4.2%，跑贏一眾藍籌。遭淡馬錫減持的建行(939) 全日仍漲1.8%。內銀、內險估值始終係低，防守性點都高啲。
阿爺態度好明顯，去年11月減息後，內地個市升得太急，想再放水都唔敢，唯有搵銀監證監出招搞吓，搞低個市少少，方便往後放水。所以內地可能仲會回，但又唔使擔心會散晒。我維持分段低吸建議。
在大市觀望氣氛下，個別半新股突受追捧。上周四上市的新龍移動(1362) ，全日收造1.13元，炒高28%；去年底上市的震昇工程(2277) 飆14.5%，收0.71元；環球信貸(1669) 升12.2%，由迪臣發展(262) 分拆，本月初配售方式掛牌的迪臣建設(8268) 收揚11.1%；日成控股(3708) 狂炒上50%，成為最大升幅港股，好明顯大家都係炒吓求過日辰。
港鐵跑贏普通地產股
個市上上落落之際，港鐵(066) 股價就創新高，相信係同佢再推日出康城第六期，發展商競投熱烈有關。
收市後，公司宣佈第六期項目已批出予南豐發展，整個項目包括四幢住宅，提供1633至2400伙單位，預計2021年落成。早前項目招標，共收到七份標書
。市傳項目補地價33.45億元，折合每方呎約2269元，較去年11月截標的第五期項目高出21%。發展商提供予港鐵分紅比例最少是15%。
由於《施政報告》無辣招，樓價再度炒熱，升勢主要集中細價樓，以至公屋單位。公屋單位賣到過萬元呎價，聽落唔係離譜，而係離晒大譜，須知公屋係有入息上限，附近環境應有社區折讓，咁都話賣過萬元一呎，點可以話正常先？
雖然細價樓咁癲，但地產股無相應上升，大部份同去年高價仲有約兩成差距，所以港鐵近排走勢就顯得突出。
有同港鐵高層相熟的茶友話，日出康城家批緊第六期，應該有社區設施。由於社區慢慢成熟，最近兩期競投反應好過以前，就算最新一期投資額大，仍然吸引到唔少財團。
樓價癲升，地產發展股跟唔上，我相信市場仍對本地物業前景有保留，股票係用嚟投資，唔同住宅有實際用途，有用家支持，所以佢哋估值係走喺樓價之前。港鐵能夠跑贏其他地產股，大抵有兩個解釋，一係佢唔止起樓，實際佢係地主，靠批地分肥，風險較少。
再者係之前佢批地批得慢，搞到特首都唔多LIKE，連CEO都換埋，家佢唔止加快批地，仲轉埋起多咗細樓，價錢賣得好之餘，仲叫做幫咗政府手，一石二鳥，連政治風險都減低埋，所以睇佢股價，係唔可以當一般地產股睇咁簡單囉！
陸羽仁
金融High Tea 舊文
