中環在線：被問幾時退休
趙國雄：我好老咩？
■趙國雄唔認老，但又叫自己「阿伯」，好複雜喎！ 資料圖片
超人李嘉誠旗下長實（001）與和黃（013）早前宣佈重組合併為長和，長和再分拆長地上市，雖然和黃大班霍建寧話重組後冇大婆與二奶之，但市場多數認為超人係變相減持地產業務，長地更似二奶。長實樓神趙國雄將來負責長地，重要性會否減退？唔知係咪崩口人忌崩口碗，樓神噚日俾人問佢幾時退休，竟然就幾大反應咁話：「乜我好老咩？」
阿女聽到哢哢笑
話說趙國雄噚日以置富產業信託（778）主席身份主持置富業績會，突然被人問到有冇諗過退休，佢好愕然、幾大反應咁話，「乜我好老咩？都係幾十歲啫，仲有份工做，我都好高興㗎。」
佢個女趙宇擔任置富副行政總裁，坐喺旁邊聽到阿爸咁樣回應都哢哢笑。趙國雄驚大家聽得唔清楚，補充話，按重組計劃，佢之後會做長地執行董事，對長地同香港樓市都好有信心，未有咁快諗退休。
咁又係，超人八十幾歲都未言退，趙國雄只係六十有四，又邊夠膽話退休喎。更何況，佢二○一二與二○一三年喺長實分別袋走二千七百萬同埋接近二千九百萬元，斷估佢仲想袋多好多年啩。
不過咁，雖然趙國雄一邊話自己唔係咁老，但轉過個又形容自己係「阿伯」。因為有心水清嘅人發現近期佢少咗出面賣樓，好耐冇見佢扮鬼扮馬，好似長實舊年積極推大埔嵐山，好多時只係見劉啟文同靚女何家欣主持大局。
趙國雄就講笑咁回應話，成日見佢呢個「阿伯」做乜呢？要留番啲機會畀後生出嚟喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
