一周三件：海通國際抵買
■林湧任副主席的海通國際，PE是中資背景券商股當中最吸引的一隻。 資料圖片
券商股喺上周五俾阿爺出招小懲治，但係本周一就跌到阿媽都唔認得，但諗深一層，大環境無變，反而提供撈貨嘅良機。場內海國際（665）好抵搞，PE係中資背景券商當中最吸引。
喺本周一H指同券商股洗倉式大插，但睇港股呢兩日成交，都挨住千億銀，尤其係以香江做主打地區，包括海通在內券商，繼續好景。再講，家陣港股交投雖然增加咗，但相對起祖國同胞上七十八萬億銀人仔存款，用九牛一毛形容港股成交額，都嫌多。
秤估值平通街
而喺嚟緊嘅日子，阿爺keep住開通深港通，以及滬港通擴容，中港股市大融合，同人民幣終極會自由兌換嘅大前提底下，祖國金融政策開放，未來港股交投將進一步提升，加埋海通國際又有強勢大股東嘅優勢，更加掂過碌蔗。
場內專業評估，海通國際今年每股盈利0.48元，就算反映曬之前供股攤薄，現價（4.84元）預測PE得十倍，係繼英皇證券（717）後，係場內最平一隻券商股。又同樣係有中資背景嘅行家，中州證券（1375）今年預測PE，貼近20倍、國泰君安（1788）12倍。而祖國券商，經過周一嘅大插後，預測PE亦唔平得去邊，中信証券（6030）係講緊貼近20倍、阿媽海通證券（6837）同另一隻銀河證券（6881），皆18倍以上，海通國際係至平嘅選擇。
仲吸引嘅係，海通國際家陣PB得1.33倍，上邊祖國行家，就算以香港做主打區嘅國泰君安，又阿媽海通證券PB，挨近兩倍，而中信証券更加去到2.3倍，海通國際平咗一半。買海通國際，當保守到只係追番上國泰君安PE水位，講緊要升兩成到5.8元，追到去行家兩倍PB水位，現價係講緊要翻一番！
錢雋
細價股專家
本欄逢周二、三、五刊出
錢雋
一周三件 - 錢雋 舊文
