魚樂無窮：揭領匯長升長有之謎
■酷愛磚頭嘅炒家去曬邊？就係買地產同房託股，難怪領匯升極都仲有。 資料圖片
先旨聲明，今日繼續冇推介，要冧巴請移玉步至邱古奇、魏力專欄。
一一九慘案後，中港股市連升第三日，雖未完全收復失地，但都好得七七八八。睇下自己個倉，持貨多咗定少咗？如果好似唐牛咁少咗，唔使驚，好正常，散戶十之八九都喺星期一犧牲唔少平貨，希望更低位撈番。結果？正如買六合彩一樣，排隊買飛嗰陣雄心壯志，攪完珠就無厘神氣，好多嘢都係事如願違。
如果持貨多咗，恭喜你！常人面對瘋狂震倉，最多死坐唔沽，而你夠膽反手加注，承繼當年四叔叫人面青時買貨嘅真傳，再波動嘅市況，應該都唔會難到你。
話題一轉，到樓市。上車盤價錢好似民怨咁，越嚟越高。由二字頭起步，到三字頭，到而家四字頭。質素呢？唔好意思，選擇由私樓去到居屋，再由居屋去到公屋，價錢上升，質素下降，正正係民怨嘅來源。自住難，投資更難，買樓收租，要畀乜D物D，七除八扣下，真正落袋嘅租金回報，隨時得兩三厘，仲要承受樓價見頂回落風險。
股市難炒樓市冇得炒，唔係今時今日嘅事，酷愛磚頭嘅炒家去曬邊？就係買地產同房託股，點解恒地（012）舊年升幅冠絕藍籌？點解領匯（823）得番三厘幾息都有人搶，破頂好似食生菜咁易？謎底已經解開！
唐牛
https://www.facebook.com/tongcow88
唐牛
魚樂無窮 - 唐牛 舊文
