中環在線：洪丕正跑鞋襯曬渣打
螢光青搭藍色 識做兼搶鏡
【花盡心思】洪丕正對螢光綠Nike波鞋好搶鏡。 許頌明攝
渣打香港馬拉松每年吸引到一班政商界名人參與領袖盃，今年冇後生嘅富二、三代，全部都係「領袖級」代表。渣打作主人家，當然傾巢而出，由大中華區行政總裁洪丕正領軍，共有九位代表參賽，洪丕正仲專登著上一對螢光青綠搭藍色嘅跑鞋，襯曬渣打嘅企業顏色，估唔到佢咁識做，仲搶曬鏡㖭。
今年領袖盃有三十八人參賽，渣打有九名代表，佔約四分之一，包括香港、中國同埋台灣區嘅行政總裁。一眼望埋去起跑線，最搶鏡肯定係洪丕正，事關佢著住對螢光青綠搭藍色嘅Nike波鞋落場。
聞說，洪丕正真係為咗渣馬而去買呢對跑鞋，話咁樣落場跑，可以襯埋渣打嘅企業顏色。華華上網搵資料，同佢呢對相同型號嘅跑鞋，售價過千蚊，不過呢件事都唔關幾多錢事，而係見到呢位高層幾咁有心思。
【馬虎hea跑】鄭維志著皮鞋落場，擺明係陪跑。 鄭維志著皮鞋落場
同場見到只係志在參與嘅馬會大董兼永泰地產（369）主席鄭維志就係另一回事嘞，佢冇著跑鞋，條褲都唔似係運動褲，擺明只係落場陪大家行下，臨尾衝線先作狀跑幾下喇。
鄭維志噚日都笑笑口指住自己對鞋，話係打算慢慢行，所以著皮鞋都搞得掂。佢話，已經係第四年參加領袖盃，主要係想身體力行支持慈善活動，賽前確係冇乜準備，諗住行㗎咋。
其實領袖盃相當短途，由灣仔運動場起步，跑到維園，全程只得1.8公里，今年冠軍來寶集團首席執行官Yusuf Alireza以七分五十五秒完成。即使半行半跑，廿分鐘內一定搞掂。大會唔公佈三甲以外嘅成績，只係話洪丕正喺廿名之內。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
