異動空間：十萬億掃貨攻略
歐央行終於豁出去，跟大隊打嗎啡救經濟，三月開始每月印銀紙六百億歐元，為期十九個月，總額十萬億港紙，太多個零，究竟實際幾多錢？計計數，十萬億夠買起七間滙控（005）、八家騰訊（700）、廿三間和黃（013）都係太虛無？Anyway就算你每期中五百萬元六合彩，中足一世都冇咁多錢。
印銀紙同打嗎啡一樣，要有效劑量一定越來越多，副作用也越多。記得二○○九年阿爺放水四萬元億人仔，股市的確爆升，但產能過剩問題到家陣都未解決。日本QQE年年加碼，最新去到八十萬億日圓，通脹都谷唔起。美國三輪量寬，股市係上，經濟走出衰退，但一次效用比一次低，總共使咗七十萬億美金。歐元區內，歐豬一街都係隻隻等救，十萬億元相信只係前菜，有排佢印呀！
講番個市，A股上周一仲講緊股災、轉頭周五就創近年新高，阿爺真係能人所不能。但滬股三千四百關衝咗三次都企唔穩，短期可能又波動。港股八、九成熊仔陣亡，再衝誘因成疑，可能轉番炒股不炒市。學曾教授話齋，升就坐跌就買，再跌再買，唔好怕震倉，長揸先贏大錢嘛！
魏力
http://www.facebook.com/2012jason
魏力
異動空間 - 魏力 舊文
