歐強美弱
2015/01/26 09:35:32
網誌分類: 經濟
歐洲上週四掟出一個規模比市預期更大的放水計劃，全球股市應聲炒上。上週五，歐洲股市強勢持續，平均再漲1.7%，其中德國股市大漲2.1%，法國股市亦漲1.9%，歐元兌美元則跌至超過11年以來低位，但美股已經開始乏力回軟。
美國上週五公佈的12月領先指標上升0.5%，好過市場預期，預示短期經濟強勁，但股市跟唔上，不升反跌，午後跌幅擴大。杜指收市跌141點至17673點；標普500指數跌11點，收報2052點；納指靠穩，微升7點至4758點。總結全個星期，杜指漲0.9%，標普500指數漲1.6%，納指上漲2.7%。
比起歐洲股市，美股跑輸好多，有分析指出，一來歐洲央行放水，歐洲係主場，歐洲股市直接受惠，有少少擔心資金由美股流向歐股。
另一因素係有分析認為歐股仍有水位。儘管歐洲股市因為放水預期推動下，炒上七年高位，歐元區企業市盈率高於歷史平均水準，但以其他的估值指標計卻未為貴，如計資產值的股價與帳面價值比率(Price-To-Book Ratio)，以及扣除週期性因素的市盈率(cyclically-adjusted price-earnings ratio)，兩個比率分別低於長期平均水準23%和30%。
即使睇市盈率，如果用週期調整市盈率(CAPE)，即係用10年的平均盈利取代普通歷史市盈率用過去一年盈利來計算，歐洲股市股值仍具有競爭力，鑑於美國已經經歷了6年牛市，（標普500指數預估市盈率為16倍，同歷史平均值差唔多），預計美股今年即使再升，表現亦將不及其他發達國家股市。
事實上，交易商今年最睇好的美國ETF(交易所上市基金)是美國以外MSCI世界股票指數ETF。包括IG首席市場策略師Chris Weston的分析都認為，今年歐洲股市可能趕上美股。隨住歐版QE的實施，再加上歐元兌美元匯價由由去年8月最高位的1.3992美元，一路跌到上週五嘅1.134美元，大跌幅接近兩成！歐洲股市變得更加便宜，吸引力進一步大增。
基金追蹤機構EPFR Global最新數據顯示，歐洲央行宣佈政策前的一周，歐洲地區股市基金的資金流入規模升至一年高位。歐洲相關的交易所上市交易基金(ETF)在歐洲央行公佈推出QE後股價大漲，其中SPDR Emerging Europe ETF 上星期跳升3.7%，創9月以來最大單周漲幅。
不過，我覺得在QE的推動下，歐股短期內仍可能走高，但中長期表現，仍要睇QE能唔能夠對刺激實體經濟起到推動作用。唔得的話，歐股又會跌番落嚟， 有少少似日本咁，首年放水大升，之後比較呆，不似美國連升6年不斷創高。另外，隨著希臘大選臨近，可能會為歐洲股市帶來一段動蕩，要短線炒作嘅，大跌時又不失為一個入市機會喎。
講番美股，隨著歐洲QE效應次冷卻，市場焦點又會集中番去美企財報表現，下周係公佈潮高峰，將141家標普500企業派成績表。其中包括蘋果 和微軟等科技巨頭，預期科技股將成為亮點。標普500企業的獲利增幅目前預測為3.3%，盈利預期由第四季開始已大降，原因係能源企業獲利預估大幅下調。
市場另一個焦點係聯儲局明天開始嘅兩日議息會議。投資者正在研判繼加拿大減息、歐洲放水後，聯儲局會有乜反應。分析估計聯儲局會更難按計劃喺年中開始升息，以避免使美國經濟政策與世界其他地區不同步。因為如果在其他主要經濟體擴張貨幣政策，美國卻加息，收緊政策，將進一步推高美元，對大宗商品價格進一步施壓，加劇通縮威脅。所以預計聯儲局對於加息決定仍會按兵不動，繼續重申會「耐心對待升息」。聯儲局幾時加息，一直係投資者的關注焦點，聯儲局如果話可以等等，大市又唔會太衰喎。當然，港股而家變咗三分二睇大陸市，三分一睇歐美市。
陸羽仁
回應(2) 我想回應
陸羽仁 BLOG 舊文
