魚樂無窮：如何善用注碼贏到盡
■中交建近期明顯跑贏中鐵建及中鐵。圖為中交建集團主席劉起濤。 資料圖片
眾所周知，有金牌莊家之稱嘅詹培忠，玩百家樂玩到出神入化，早年試過短短10個月，玩百家樂喪贏兩億，全世界賭仔葡萄指數爆燈。詹培忠接受傳媒訪問時，道出16字真言，其中「贏谷輸縮」呢4個字，成為唐牛炒股嘅座右銘。
炒股如何贏谷輸縮？即係一隻股有錢贏就加注？輸錢就要狠沽？答啱一半，嚴格嚟講上述係執行方法，至於何謂贏何謂輸，應以整個股票組合為依歸。唐牛幾年前開始，每日都會記錄低股票組合總值，所以對於贏輸趨勢及幅度都瞭如指掌。
入賭場玩大細，買十鋪都開對家，只能歸咎自己黑仔，但炒股呢？連續幾日甚至幾星期都輸錢，就肯定唔關運氣事，問題可能在於股份質素、大市趨勢，面對如此情況，最好減低注碼，先避其鋒。同一道理，當發現股票組合總值直線上升，恭喜你，證明你揸啱股兼食正升浪，向上溝博盈利倍大才是王道。贏谷輸縮對玩開孖展嘅戰友尤其重要，贏當然可以開曬巷，但輸亦都會更入肉。往往唔知自己炒股贏定輸嘅你，由2015年開始，開個excel好好記錄吧！
今日推介中交建（1800），上周五靚破固然係勁，近期亦明顯跑贏中鐵建（1186）及中鐵（390）。現價先買一注，倘回至10日線9.5元可再加碼。目標？等滬綜指大浪升完就知。
唐牛
https://www.facebook.com/tongcow88
唐牛
魚樂無窮 - 唐牛 舊文
