異動空間：內房殼股生猛曬
外遊泰國回港，個市仲炒緊中資金融加基建，不少蟹貨多年的散戶終返家鄉，紛紛沽貨走人，但有冇諗過邊個咁慷慨，買上去等你甩身？升浪形成、成交激增，大戶必然是主力資金，佢哋人面廣、資源多，識跟點都要跟大戶，中資金融基建股，買咗鎖入夾萬。
放水炒咗個幾月，內房股終於爆升，減息後推介的保利置業（119），捱過12月兇殘調整後，上周狂升28%，由最弱變最強，稍為整固後，下站可上望4.2至4.4元水平。
內房殼股生猛曬，按圖索驥，招商局置地（978）突破三個多月橫行區，動力澎湃，短打可睇1.5元。該股為深圳上市招商地產的唯一海外上市平台，招商地產炒自貿區概念，近六周狂飆1倍，招商局置地股價相對更為誘人。8月份，公司首獲注入逾12億元人民幣廣州房地產項目，相信只是頭盤，主菜仍未上枱，做大做強潛力龐大。去年首三季，售樓收入分別為11億、16億及23億元（人幣．下同），配合放鬆限購及減息等催化劑，第四季應相當有睇頭！公司去年斥逾50億元買地，可售項目160億元，唔憂冇貨賣。天時地利人和齊曬，呢個價位買，輸面相當低。
魏力
http://www.facebook.com/2012jason
魏力
異動空間 - 魏力 舊文
