強美元
2015/01/05 08:44:50
網誌分類: 經濟
美股2015年首日先升後回，受差過預期的經濟數據拖累，大市由升轉跌，尾市靠穩。杜指收報17833點，微升10點；標普500指數微跌不足1點，收報2058點；納指跌9點至4727點。
美國上週五公佈的11月建築支出意外下滑0.3%，遠差過上月的增長1.2%，以及市場預期的增長0.2%。建築支出下降，主要受公共建築開支減少了1.7%拖累，而私人住宅項目仍有0.9%的增長。
另外，美國供應管理協會(ISM)12月製造業增長指數亦降至55.5，低過上月嘅58.7，係6個月以來最低，市場則預期57。
上週五公佈的經濟資料，似乎顯示美國經濟狀況一般，打壓了市場投資情緒，令到大市由升轉跌。不過，分析普遍認為經濟資料只不過是有些疲軟，認為美國經濟仍在增強的狀態未有改變。我亦認為係咁，美國經濟強勢未變，事實上，大市臨收市前已見回穩，杜指以紅盤收場。
美元續升，大宗商品價格繼續向下，其中2月紐約原油期貨跌穿每桶53美元至52.6美元，銅價亦跌至超過5年新低。正當大宗商品市場跌至無人敢沾手的時候，自認是商品大王的Gartman Letter 作者Dennis Gartman卻提出一個幾有趣嘅投資建議，佢叫人買金，不過不是就咁買，而係沽歐元或者沽日圓買黃金。理由係由歐元及日圓相對於美元會持續眨值，將仍會係大趨勢。
Gartman指出去年歐元及日圓相對美元已分別貶值11%及12%，如果沽歐元或日圓買黃金，年內已經分別賺到8%及10%。（金價上日收市每安士1186美元，不過全年計又唔算跌得多，全年至今只下跌了3.8%。）
我睇完Gartman篇文，覺得有啲怪，佢係睇好黃金，但又覺得美元強，所以就諗出沽歐元沽日圓買金呢招，但你睇番去年，不如就咁沽歐元、日圓，仲俾沽歐元、日圓買金賺得多。
去年根本就係美元強，搞到其他乜都弱，恐怕呢個趨勢會持續，因為美國經濟續強，美國又很有可能加息，所以除非日本、歐洲經濟明顯改善，否則只能放水谷經濟，日本央行已擴大資產負債表，歐央行則將可能放大量化寬鬆對抗通縮，歐元或日圓這兩個弱貨幣，今年將保持弱勢，歐元及日圓的跌勢較難改變。
黃金係無息貨幣，主要以美元報價，美元強，黃金就弱，佢只係有少少基本因素，係印度和中國使用黃金的需求，除非兩地經濟大幅轉強，否則金價亦只有繼續弱。但黃金比歐元、日圓跌少啲，皆因黃金無太多基本因素，唔似兩地經濟係弱底，加上國際政治狀況不穩定時，投資者又將會尋找一些比較安全的資產避險，除了美債就想到黃金，所以比歐元、日圓好啲。
結論係唔好形成太強睇好黃金的感覺，應對強美元有認知，強美元時，應是美國經濟甚至在國際政治上比較強的時候，要順住呢啲勢搵食，唔好同強美元作對。香港人唔好搞沽歐元日圓去買金，唔好買外幣就真，人仔都有啲貶值壓力，雖然幅度不會太大，今年買人仔，就不如買國企股啦。
陸羽仁
回應(3) 我想回應
陸羽仁 BLOG 舊文
