中環在線：周嘉儀轉行講股
唔做主播 加盟興證
■周嘉儀投身新聞界已經十二年，傳聞佢打算考證券牌照轉行。 設計圖片及對白 
宅男們要留意嘞，上月底神神秘秘遞信辭職嘅大台主播周嘉儀（Venus），原來唔係嫁人，而係轉行呀！噚日有消息傳出，周嘉儀將會離開大台，加入一間證券公司。聞說，佢係加盟中資大行興業證券旗下嘅興證香港，由新聞轉行做證券。
華華噚日直接問周嘉儀係咪去興證，佢禮貌地回應話暫時唔方便講，只係透露四月之後先至返新工。
珠珠小飛俠都做金融界
浸大新聞系畢業嘅周嘉儀今年三十三歲，投身新聞界已經十二年，舊年仲完成咗城大工商管理碩士（EMBA）課程。有指周嘉儀係繼趙海珠（Alison）同林燕玲（Ruby，小飛俠）之後，第三位同時為大台五個時段報道新聞嘅主播，估唔到結果三個人轉入金融界。
雖然未知周嘉儀過檔去興證香港究竟係做乜東東，只係知道佢將會為新事業報考證券牌照，莫非佢都想變身成為靚女股評人？
前新聞之花兼輪後、𠵱家係幸福少奶嘅Alison，對於周嘉儀考牌轉行，唔覺出奇。佢話，由於當年轉去賣窩輪，職責範圍涉及向客戶提供投資意見，所以轉行時都要報考證券牌照。佢文科出身，其實覺得好吃力。
至於呢間興證香港，二○一一年已經成立，目前冇任何代言嘅股評人，有傳佢哋早前曾經打算挖走一間本地證券行嘅女股評人，結果不了了之。
近幾個月佢又開始四周圍招兵買馬，除咗周嘉儀，亦都挖走咗一間中資行嘅幾名大經紀，辦公室亦由上環無限極廣場搬到租金應該貴一截嘅中環友邦金融中心，睇落似係有意將盤生意發大嚟搞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
