一周三件：建滔母憑子貴
■建滔化工股價跌至三年低位，PB僅0.36倍，值博率高。 資料圖片
建滔積層板（1888）由二○一四年十二月中低位2.77元一彈，喺兩個月就升咗26%，兼且有勢撲頂，而佢阿媽建滔化工（148）就潛到落一年底，炒同氣連枝，阿媽建滔有得諗。
建滔除咗透過阿仔建滔板生產覆銅面板產品，自家主打印刷線路板兼拓展埋內房業。建滔呢期同阿仔建滔板分道揚鑣，股價插到一年低位，兼喺近三年底，現價（12.40元）得0.36倍PB，而建滔板經呢期一支箭咁升，PB收窄到只得0.8倍。
內房業務開始發力
要咁睇，建滔板嘅覆銅板瓣數，食住近年智能手機大熱，喺嚟緊嘅日子，應該繼續好掂檔，建滔可母憑子貴。而建滔內房瓣數開始發力，喺二○一三年嘅物業銷售41.7億元，又上年上半年，實現銷售十七億元，大升1.4倍；又就算無地產業分拆上市呢個因素，喺上年上半年，投資物業價值進一步釋放，建滔亦已經可以增值多6.3億元。
建滔家陣喺祖國揸土儲超過六千萬平方米，隨住阿爺放水同放寬限購令，喺嚟緊日子，內房業嘅爆炸力，唔可以睇少。咪估多，建滔土儲每方米增值/獲利一百蚊咁計，已經可以為集團額外增值六十億元，或每股5.9元！
睇到嘅係，內房keep住成為建滔一個持續性收入來源之餘，兼可以抵銷特別係化工呢瓣短期唔穩定情況。場內大孖沙摩通呢期發報告，將建滔目標價大降兩成半，由原先二十八蚊，削到去二十一蚊。就算以呢個目標價做參考，建滔現價係要升七成，已經超級肥仔。
唔貪心，當炒同氣連枝，建滔升番建滔板近兩個月26%升幅，見15.6元，PB講緊得0.45倍，比起場內其他內房企業，或者環球同級印線路板企業，呢個PB水位，一啲唔過態。
錢雋
細價股專家
本欄逢周二、三、五刊出
錢雋
一周三件 - 錢雋 舊文
