魚樂無窮：星謙尋頂之旅有排玩
■冷門股星謙化工升勢有根有據，值得關注。圖為集團主席楊淵。 資料圖片
上月底推介澳門餐飲股佳景（703）發盈警，低開一成後拾級而上，埋單幾乎平收，圖表營造完美雙底，盈警因手信業務錄得大額宣傳費用、滙兌虧損以及公允價值收益減少，第四季核心業務收入為全年最佳，見底味濃，低基數效應下，今年隨時大翻身，有貨可續持有。
升幅榜入面，見到隻冷門股星謙化工（640），睇真啲，從基本因素抑或財技角度出發，升勢有根有據，值得關注。星謙化工係內地四大膠水生產商之一，八十年代成立，二○一○年在港掛牌，屬實幹一族，產品主要用於鞋類及電子產品，原材料是石油副產品，近半年油價喪跌，今年生產成本肯定大減，原來已近三成嘅毛利率勢必再升，股價破頂頓時變得理所當然。
財技角度方面，大股東兼主席楊淵揸貨72.5%，以總發行股數六億股計，街貨只得億零股，要炒上話都冇咁易。加少少想像力，最新市值七億幾，貨源歸曬邊，說穿了又係一隻靚殼。
仲有一點要留意，星謙上市時獲得李嘉誠垂青，持有5%股權，雖然只係講緊幾千萬錢，但掉轉頭諗，超人掌控幾千億上市王國，都用零頭來支持星謙，象徵意義大到難以量化。星謙現價市盈率十八倍，以工業股身份嚟講屬偏貴，但作為潛在盈喜及賣殼股睇，就有大把憧憬空間，呢轉尋頂之旅睇嚟有排玩。
唐牛
https://www.facebook.com/tongcow88
唐牛
魚樂無窮 - 唐牛 舊文
