魚樂無窮：摩比大爆發買定離手
■摩比靚破阻力位，值得優先關注。 資料圖片
滙控（005）業績差強人意，炒房生意唔掂，仲要面對因逃稅風波帶來嘅天價罰款，縱然末期息有增無減，令股息率逼近六厘嘅高水平，但前景迷濛一片，好大機會賺息蝕價，無謂陪佢癲。
電訊設備股昂納光通信（877）發盈喜，預計去年盈利爆升三倍，刺激股價單日衝高三成，氣勢磅礡。一石擊起千重浪，同業亦全線造好，其中摩比（947）靚破阻力位，值得優先關注。
摩比業務包括天線系統、基站射頻子系統及覆蓋延伸方案，簡單啲講，係一隻不折不扣內地4G概念股。公司上半年業績已開始逐步反映優勢，營業額倍增至7.6億元（人民幣．下同），盈利更升4.8倍至四千五百三十四萬元。以為強勢就此結束？當然唔會咁短癮。公司舊年九月宣佈，由於定單太多，產能超出負荷，所以深圳光明新區新廠房及研發中心正式投入營運。嘩！生意多到要開新production line應付，有幾好景唔使我講啦。根據專業數據，內地4G前期投資高達五千億，即係五字後面有十一個零，摩比最新市值只得十幾億港紙，潛力可以講係無極限。
事實上，公司早已為全年業績報喜，保守估計全年賺一億，市盈率僅十二倍，以一隻增長股嚟講，實在平到笑，如果派息和味，肯定會引來基金瘋搶。噚日一棍劃破長空，呢一浪仲唔坐二望三？
唐牛
https://www.facebook.com/tongcow88
唐牛
魚樂無窮 - 唐牛 舊文
