異動空間：兩億主板股尋寶
遠東控股（036）向主要股東邱達根出售多項物業，套現逾億元，引發賣盤憧憬，但論值博率，同系遠東酒店（037）市值更細，只有2.2億元，僅及殼價四成，資產折讓更大，市賬率僅0.6倍，可說穩坐釣魚船，點計都更安全！
講起遠東酒店，魏力第一時間會聯想到和記港陸（715，現稱中泛控股），兩者同樣出自名門望族，所謂竹門對竹門，對家唔猛料肯定冇得傾，疊水不在話下，在行內更要有江湖地位、受人景仰先得。以泛海老闆盧志強為例，其內房旗艦泛海控股在深圳上市，市值六百六十九億人仔，個人財富近一百七十億元，仲要係全國政協委員，位列胡潤房地產富豪榜第八位，買完隻殼輕鬆就炒高一倍。可以預期，遠東酒店要賣，對家肯定係猛人，買完升幅將以倍計，家陣買係識於微時，只要有耐性堅定持有，隨時帶來驚人的回報！再講，遠東酒店業務簡單，主要持有長洲及北京的華威酒店，另加一點證券投資，每年收入不足四千萬元，純利（不計物業重估）幾百萬元，賣殼隨時相等於十幾廿年盈利，作為生意人呢條數點會唔識計？
魏力
http://www.facebook.com/2012jason
魏力
異動空間 - 魏力 舊文
