魚樂無窮：尋找下顆公用股新星
■潘浩文人脈甚廣，對中國飛機租賃未來發展，百利而無一害。 資料圖片
長江基建（1038）粉絲四萬咁口同唐牛講︰「你睇，長建股息率就嚟三厘都冇喇！」兩個原因，價升或息跌，長建呢個例子，當然係價升。點解升得咁勁？環球貨幣戰開打，鬥減息鬥貶值，經濟唔掂，央行惟有喪開水喉救市，公用股不受大環境影響，有升有息變得理所當然。
傳統公用股升完再升，大家都流曬口水。放眼將來，公用股第二代會係邊個行業，橫睇竪睇，飛機租賃最有潛力。行業運作好簡單，先以折扣價向飛機製造商買入大量飛機，然後轉租予航空公司，平均投資回報達9%，兼有穩定現金流收入，與公用事業特質不謀而合，難怪超人、純官，甚至股神畢菲特都爭住入場。
去到呢度，心水清嘅戰友，都知我會推介中國飛機租賃（1848）。國務院前年底已發佈《關於加快發展飛機租賃業發展的意見》，講明要谷起行業，有阿爺照住，冇得輸！公司股東之一潘浩文為黑龍江省政協，佢渣fit嘅富泰資產最近有份收購法國圖盧茲機場，中資如此走出去實屬罕見，反映潘浩文人脈甚廣，對中國飛機租賃未來發展，百利而無一害。公司本身亦積極擴軍，去年底以八百億購入一百架飛機，實行做大做強，日前仲發埋盈喜。呢種營運模式令人想起六年股價升咗一百倍嘅光大國際（257）。而家中國飛機租賃市值只得六十四億，四個字總結︰大把世界！
唐牛
https://www.facebook.com/tongcow88
唐牛
魚樂無窮 - 唐牛 舊文
