等嫁有錢人
2015年02月04日
外圍股市呢排上上落落，唔同資產價格都係浮浮沉沉，主要係因為前景唔係咁好，但各地央行又落力托市，變成想升又升唔到，但要跌都唔容易，搞到港股呢排觀望氣氛濃厚。喺呢種市況下，反而股市最興炒下相反，唔貪心走短線，好似內地金融股跌了幾日，若然低位有入貨，個市昨午開始大反彈，可能又有機會食胡。
上綜指似短期築底
內地股市五連跌後，滬市終於反彈重上3200關。人民銀行在春節前加碼放水，在公開市場進行900億元人民幣逆回購。滬市尾市升勢轉急，上證指數收報3204點，漲76點。金融股全線上揚，證券股升4.6%，保險及銀行股各升4.3%及2.5%。
睇圖上證綜指似乎周一在低位3122點築咗個底，唔排除短期會繼續反彈。但上方3400點又好似天花板咁，唔係咁易升穿。我估要阿爺出到再減息或減存款準備金率呢啲大動作，上證才會上破3400點的高位，在大動作出台前，都係炒吓上落市。
由於A股彈得幾急，中資金融股表現標青，當中建行(939) 、平保(2318) 與國壽(2628) 合力貢獻恒指71點升幅。內地證券股表現都唔錯。中信證券(6030) 爆上4.5%，造25.45元，是表現最佳國指成份股。
呢輪無論股市、匯市都係炒上落，好似跌到殘的油價連升三天，石油與油田服務股表現佳。中海油(883) 升3.5%，造10.64元，其他油服股升幅仲顯著。反觀航空股，受油價連升以及人民幣下跌拖累，全線整日無運行。國航(753) 跌3.9%，造6.88元，是最差國指成份股；南航(1055) 瀉6.2%，報3.8元；東航(670) 插6.5%，至於國泰(293) 挫3.7%，報17.32元，為包尾藍籌股。
油價顯著反彈，令人關注見底未。從大油商的回購自己股票行動去睇，佢哋唔係咁睇好。兩大能源巨頭Chevron上周停止回購，ExxonMobil由本周一起將回購減少一半，這是一個重要的姿勢，佢哋都未敢睇好，見股價一定番就停手，留番啲子彈下一波再回購。如果從政治角度睇，美國同俄羅斯關係未見重大改善，油組打擊頁岩油生產商的戰術仲未全面奏效，照計油價未有大升條件，所以見油股高升追貨風險唔細，相反，航空股再插仲有留意價值。
反向炒作油股航空股
內地航空股滑落涉及兩個因素，一個係油價反彈，一個係人仔匯價見兩年低位。油價因素唔係咁擔心，要留意係人仔匯價，唔排除會有跌多些少的機會。如果人仔貶值，咁內航買飛機畀美金就會畀多啲，成為不利因素。如果唔想受人仔影響，就可以考慮低撈國泰。
另外，新鴻基公司(086) 以初步作價40.95億元，出售旗下新鴻基金融70%股權予光大證券，消息公佈後光控(165) 飆升5%，收17.34元；新鴻基卻先升後挫，跌了6.1%，收6.57元。
一間證券公司家仲賣到幾十億元，點睇都唔算平，從86仔的角度，家做證券競爭激烈，若然無番間國企做股東，齊齊北上，焗喺香港，真係好難搵食，家佢賣咗啲股份，多咗幾十億現金用嚟做融資，加上賣股後會全力催谷上市，點睇都應該有利，股價升完回落，主要都係好消息出貨。
由呢個交易睇，滬港通最直接影響，係多咗內地證券商南下購物，好多本地金融機構都等嫁有錢人！
陸羽仁
金融High Tea 舊文
