魚樂無窮：平靚正的蘋果概念股
■東江息率超過3厘。圖為集團主席李沛良。 資料圖片
A股結束升勢，港股慢三拍反彈128點，不過焦點明顯喺二三線股身上，你睇升幅榜，冇兩成升幅入唔到十大，頭五位有三隻成交過億，絕對唔嘢少，證明遊資極多，指數唔上唔落，搵個股炒最實際，撲中一兩隻都咪話唔會和味。
新威國際（058）周一發盈警，預計虧損進一步增加，噚日反高潮爆上四成，發生乜事？睇真啲，未升前市值唔夠4億，原來又係炒賣殼憧憬，噚日平均成交價0.355元，自問轉身快膽識夠，可用呢個價做參考，小注入場博派對未完。
東江獲金手指垂青
唔敢搞細價股？冇問題。畀多隻績優股大家︰東江集團（2283）。本欄不止一次推介呢隻模具產銷商，記憶所及，每次品題都有新催化劑，今次亦唔例外。話說萬眾期待、下個月開賣嘅Apple Watch，東江原來攞到相關注組件定單，市場估計Apple Watch今年銷量起碼千五萬隻，埋單數以百億計，東江真係開香檳都嚟唔切，配合原有手機及可穿戴設備、家電、醫療、汽車等生意，如虎添翼也！
事實上，東江現價市盈率僅十倍，息率超過3厘，名符其實好打得，難怪金手指惠理密密增持，最新持股量去到7%樓上，以其價值投資策略，好大機會仲儲緊貨，破頂相信只係時間問題。
唐 牛
https://www.facebook.com/tongcow88
唐牛
魚樂無窮 - 唐牛 舊文
