中環在線：傳三年學費28萬 媲美MBA
「馬雲大學」首日教木工
■第一堂唔係講營商經濟，而係做木琴。 互聯網
曾經話自己高考要重考三次，先上到大學嘅阿里巴巴集團主席馬雲，可能唔鐘意上大學讀書，因為要好似史前科舉考試，要死記公式同答案；於是一直創意多多嘅馬雲，一手創辦「湖畔大學」，話「專門研究失敗」，最後收咗36個學生，日前正式開學，但馬雲就冇到場見一見佢首屆學員。
■湖畔大學日前正式開學，創辦人馬雲就冇到場見一見佢首屆學員。 
■湖畔大學前身係馬雲私人會所「江南會」，入面佈置古色古香。 傳首屆學員包括汪小菲
第一堂到底學乜呢？原來唔係講營商經，亦都冇講阿里巴巴嘅歷史，但就要求一班學生到杭州市一間木藝館分組整木琴，有學生就估，「木琴可能開學典禮用」，亦有人覺得係為咗畀學生透過活動互相認識。
雖然課程同一般MBA或其他碩士課程有極大分別，但學費一樣咁高，兼要求嚴格，有傳三年學費高達28萬元人民幣，而每兩個月要到杭州上五日堂，一旦累計缺席超過64小時就會被退學。而能夠成為馬雲嘅學生，點都要有番些少實力。據網上流傳嘅湖畔大學學生名單，包括俏江南總裁汪小菲、有傳與中國Uber合併的「易到用車」創辦人周航、汽車之家CEO秦致，以及好幾間內地創投基金的創辦人。
有人分析，馬雲會揀呢班學生，或者點解咁多企業創辦人願意做馬雲嘅學生，係因為加入「馬雲生態圈」之後，可以為佢哋帶來人脈及資金，亦都係一班初創企業家最需要嘅資源。不過，呢班企業家個個都身居要職，到底能唔能夠完成課程呢？就要等三年後，有幾多人可以成功畀馬雲「撲」頭畢業喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
