中環迷你裙：業績勁靚機械股
■CW Group主打精密工程解決方案及機床製造。圖為集團主席黃觀立。 資料圖片
股市好玩的地方是，一旦有史無前例事件發生，買賣雙方往往失去理性，股價反應特別大，沽空機構匿名分析前日予神冠控股（829）強烈買入評級，股價抽升9%，前無古人，睇到全城O曬嘴。入完貨的股民楔高枕頭諗過後，發現唔對路喎！明明去化妝品舖買香水A，Sales𠱁𠱁嚇買咗唇膏B，明明B唔係招牌產品，最後只聞到陣陣燶味。
沽空機構強項是炒落，本報投資版強項必然是炒上個股，Samantha予以CW Group（1322）強烈買入評級，此股條數標青、估值平、前景一片光明。
做精密工程解決方案、機床製造的CW Group，客仔有波音、勞斯萊斯和惠普等，高門檻的技術，唔使鬥平，搵錢能力一流，全年業績扣除終止業務，持續經營業務的溢利約1.87億元，按年增加57%，現金及銀行結餘增長1.6倍，存貨大減47%，夠曬睇頭。
估值是最大賣點，PE8倍，要搵隻賺緊錢的機械股已難，在賺緊錢的機械股中，揀隻仲係單位數PE，簡直是極罕品種！公司成功開展中國和馬來西亞業務，該項收入大增7倍和5倍，各地區收入分佈轉趨平均，成功分散風險。公司透露會進軍準備復蘇的歐美市場，2015年前景大好，三個月築底完畢，一副大炒格！
Samantha
https://www.facebook.com/stocksamantha
本欄逢周三、五刊出
Samantha
中環迷你裙 - Samantha 舊文
