魚樂無窮：買利民有獎金有獎品
■利民有齊殼股條件，值得關注。 資料圖片
呢兩日新聞特別多，金管局上周五再為樓市加辣，七百萬以下住宅只准造六成按揭，政府繼續買時間，這邊廂抑壓需求，那邊廂全方位增加供應。二手成交即時冰封，但供應未到位，加上加息無期，樓價要跌談何容易。市民上車難度三級跳，令租盤需求增加，租金勢必再上，結果又係無殼蝸牛硬食。阿爺上周六再宣佈減息四分之一厘，港股高開幾百點係最低消費，今次係人行三個月嚟第三次放水，既急且密，可想而知經濟有幾差。值得留意嘅係，存款息浮動上限由1.2倍調整至1.3倍，變相不對稱減息，內銀息差勢再收窄，為今次振興經濟套餐埋單。
Magnum（2080）早前有意易手，揸fit人葉茂林透露，好多內地公司都想借殼上市，殼股非常值錢。其實唔少工業股一年盈利只得三數千萬，高不成低不就，以主板殼價五億計，賣盤所得隨時等於十幾廿年所賺，誘因極大。今日推介老牌工業股利民（229），有齊殼股條件，值得關注。
1.市值4.7億，現金佔一半，NAV接近六億，財政狀況健康。2.三大股東持股逾五成，主席黃乾利今年七十九歲，乾脆賣盤機會不低。3.公司主打家用電器，業務簡單，要易手話咁易。
我知有齊所有條件都未必會賣，但有埋六厘息打底，坐貨都有回報，如果咁好彩踏上賣盤之路，真係有獎金又有獎品！
唐牛
https://www.facebook.com/tongcow88
唐牛
魚樂無窮 - 唐牛 舊文
