中環在線：胡定旭、朱李月華
合作搞醫療旅遊
■胡定旭同朱李月華齊齊合作搞醫療旅遊生意。
人稱肥胡嘅醫管局前主席胡定旭忽然跟「殼後」朱李月華一齊搵銀，喺海南博鰲小樂島發展國際醫療旅遊項目，佢仲要做埋朱太旗下先施錶行（444）嘅聯席主席，每年袍金1,000萬元，另有花紅做獎勵。61歲嘅肥胡今次真係再創事業高峯了吧。
博鰲最出名就係自2001年由超過20個國家發起成立博鰲亞洲論壇，每年開會都係盛事。肥胡跟朱太本身應該大纜都扯唔埋，呢次就係因為國務院喺2013年批覆海南設立「博鰲樂城國際醫療旅遊先行區（博鰲醫療先行區）」而走埋一齊。
話說朱太喺2012年初入主先施錶行，而先施錶行主要代理名錶Franck Muller。朱太可能睇中博鰲醫療先行區嘅商機，亦覺得先施錶行可以擴闊業務範疇，反正公司𠵱家都係做緊有錢人生意，交差經營高檔嘅醫療旅遊應該都好有市場。
胡定旭出任先施錶行主席
公司上周五就忽然宣佈，投資3.8億人仔入股一個博鰲醫療先行區嘅綜合項目，佔股49%，其他股東包括有「博鰲之父」之稱嘅蔣曉松，項目預期2016年逐步落成。
肥胡好有機會係呢單刁嘅核心人物，事關朱太除咗搵佢做先施錶行嘅執行董事兼聯席主席之外，仲講明如果呢單刁獲商務部批准，肥胡可以獲得簽約獎金1,500萬元。另外，佢同先施錶行有3年服務合約，每年董事袍金1,000萬元，每年至少加薪10%，呢筆數仲未計酌情花紅㖭呀。
肥胡之前做過醫管局、香港總商會同埋安永會計師事務所遠東及中國區主席，𠵱家做埋上市公司主席，都說今時今日60歲絕對唔係退休年齡㗎喇。
而且，肥胡呢次大鑼大鼓去做呢個博鰲項目，亦反映佢舊年被會計師公會轄下紀律委員會裁定專業行為不當，罰佢除牌兩年兼罰款25萬元，對佢冇影響。
許家印擬建整容醫院
恒大地產（3333）老闆許家印本身瓣數多多，地產、足球、奶業乜都有興趣，「博鰲醫療先行區」呢個咁新嘅概念，佢又點會錯過呢？
許家印新近計劃透過新買番嚟嘅殼──新傳媒（708，擬改名為恒大健康產業），喺博鰲做醫學美容項目。新傳媒前日已經跟韓國原辰醫療美容集團訂立框架協議，計劃喺博鰲建立「集醫學整形、美容美體和抗衰老保健為一體的醫院」。
照咁講，大家第日見到身邊嘅朋友忽然變靚啲，就唔一定話佢飛韓國一轉，可能飛海南都得喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
