魚樂無窮：財技派怎解讀批股
■噚日爆升嘅卡撒天嬌係財技派至愛。圖為集團主席鄭斯堅。 資料圖片
眾所周知，股票市場有兩大門派─基本分析及技術分析派。兩派各擅勝場，互補不足，但近年各大央行瘋狂放水，股市生態已全面扭曲，兩者自身問題越來越多。好似領匯（823）作為一隻REIT，有四五厘息好應份，美國加息無期，唔少國家仲不加反減，高息股俾資金捧到上天，如果信基本因素沽領匯，肯定賺少幾成。
技術分析更慘，呢幾年港股塘水滾塘魚，恒指有波幅冇升幅，技術陷阱處處，跌穿支持位再抽上例子多不勝數，黃金交叉亦由利好變見頂訊號。
兩個門派各廢半邊武功，但股市聰明人多，要搵食總有辦法，有新門派更因此極速上位，講緊嘅就係財技分析。顧名思義，財技分析派主要針對公司喺資本市場動作，猜度幕後人士嘅目的。例如一間公司供股，基本分析派會簡單認為係cap水，財技分析派就會諗係咪想收乾貨源。
噚日爆升嘅卡撒天嬌（2223），又係財技派至愛。點解？公司剛宣佈以每股1.5元配售四千萬股，集資六千萬，作一般營運資金及投資。翻查資料，最新淨現金六千二百萬，唔似等錢使。批股後市值唔夠五億，未到殼價門檻，貨源亦歸曬邊，批股後大股東持股由74.5%攤薄至62.1%，財技派如何解讀？1.為賣盤試水溫；2.批手貨出嚟大炒，以反映真正價值。兩個原因一個答案︰爆升！
唐牛
https://www.facebook.com/tongcow88
唐牛
魚樂無窮 - 唐牛 舊文
