中環迷你裙：跌得最甘馬雲股
■馬雲概念股銀泰商業首站睇六蚊。 資料圖片
兩會剛揭幕，H指怒插2%贈興，對岸環保股鑊氣十足，這邊港版環保股，好似久未運動的中佬咁，跑咗一日就要唞唞，Samantha真想叫柴靜姐姐給點力。中證監批出廿四家企業IPO，H指走勢再次樣衰起來，要炒國策概念股，為免恐押錯注，不妨待兩會尾聲時再買，今次講馬雲概念股。
去年今日是馬雲概念炒得最凶狠之時，當時名為文化中國（1060）和中信21（241），冠上阿里之名就即刻升到上銀河，成一時佳話，不過家陣「火星價」歸鄉無期，有人選擇相信馬雲浪子回頭，但癡癡地等不是Sam杯茶，今次推介另一隻馬雲概念股銀泰商業（1833）。
阿里去年入股銀泰，持26%股權，兩者仲話合資公司大搞O2O，馬雲效應下，股價最高見10.6元，一年後股價蒸發一半有多，市盈率僅六倍多，平絕港股通百貨股，股價跌跌不休，銀泰下半年開始回購，七蚊撈到六蚊，出手比金融海嘯更重，仍未挽回劣勢，直至上月出現一個神秘斬倉，成交達1.16億股。能將咁大筆貨沽出街，相信是持股已在5%樓下的威靈頓管理所為，最後「散戶」震走埋，結論是：炒，家陣首十家券商竟然揸92%，比細價股更貨源歸邊，難怪近日反彈冇難度，首站睇六蚊。
Samantha
https://www.facebook.com/stocksamantha
本欄逢周三、五刊出
Samantha
中環迷你裙 - Samantha 舊文
