市跌理由多
2015年03月04日
股票市場講預期，昨日兩個數字公佈，都係唔多靚仔，一個係澳門博彩數字，另一個係香港零售數據，兩者都不進反退。澳門2月博彩收入回落的數字在中午前已經公佈，雖然幾差，但市場就話無預期咁差，所以濠賭股仲有小小反彈。跟住到下午本地數據都唔靚，本地零售股頂唔頂得順，好快就有分曉！
零售股靠高息力撐
澳門2月份博彩收入195.42億澳門元，按年大跌48.6%，為連續九個月錄得按年下跌，但跌幅少過市場預期跌53.5%，濠賭股逆市向好。金沙中國(1928) 升1.7%；銀河娛樂(027) 、永利澳門(1128) 都升逾2%。
雖然澳門股咁頑強，不過，陸羽仁依然唔敢講佢哋係咪見底，主要係唔知阿爺對澳門博彩業嘅態度有無改變，同埋反貪腐完結未。呢兩日內地先傳出中央要整治軍老虎，前中央軍委副主席郭伯雄個仔等軍二代被拉下馬，全國政協發言人呂新華用網絡妙句「很任性」潮答「打倒更大老虎時」的問題，都反映咗反貪浪潮未完，對於博彩業來說，咁即係隧道仲未見到亮光，濠賭股彈完之後係咪有力再上，唔應該太樂觀，所以撈底走短線者，有着數就要考慮睇住食胡。
至於1月份本地零售數字大跌，政府話同農曆年今年春節係2月有關。不過，出嚟嘅數字跌幅比較大，就算考慮埋呢個因素，加埋2月數字係咪追得番都好難講。莎莎國際(178) 公佈，在2月19日至25日新春期間，集團港澳零售銷售按年跌10%，表現遜於集團預期；同店銷售亦跌7%。
集團話，香港入境處公佈新春期內訪港內地旅客錄得跌幅，不過集團內地客交易量仍上升5%，惟受每宗交易平均金額下跌15%而抵銷，導致整體內地客銷售總額下跌11%，可見春節假期以及黃金周效應已淡化。
減持壓力推低A股
早幾年每逢長假，零售股都大力炒作，呢兩年已經無呢支歌仔唱，零售股都慢慢由高位回落，部份得番六、七成以至一半市值，好似莎莎，股價2013年曾逼近10元關口，昨日跌到4.33元。現價市盈率13倍，息率超過5厘，股價唔多唔少係靠高息撐住。莎莎手頭大把CASH，又係做現金生意，有條件實行高息政策，係呢行龍頭股份，其他無咁好條件嘅零售股，相信就唔係咁易頂，如果再因為水貨客收斂捱多一棍，影響可大可小。喺咁嘅環境下，估計零售股短期內，又係有波幅、無升幅。
近幾日，外圍股市紛創新高，但中港股市就唔係幾得。雖然華爾街股市造好推動恒指高開，人民銀行自減息後又再進一步放水，進行350億元人民幣逆回購操作，可惜內地股市升勢無以為繼，創一個月最大單日跌幅，滬深兩大指數分別瀉2.2及3%，港股跟隨掉頭下挫，午後失守十天線後跌勢轉急，最多跌224點，全日險守24700點收市。恒指收報24702點，跌184點；國企指數收報11945點，跌268點，成交799億元。
受A股拖累，中資金融股無運行，國壽(2628) 是表現最差藍籌股，收報32.05元，挫1.25元；平保(2318) 倒跌1.4元。
有報道就話，中證監核准24間公司的新股發行申請的消息打擊市場氣氛；2月份限售股解禁後合計減持市值為327億元，預計3月減持壓力增大；經濟形勢依舊很嚴峻，面臨通縮壓力；及降息後人民幣再迫近跌停，熱錢不斷流出等消息均不利大市走勢，總之個市一跌就理由多多！未來仲要尋吓底先。
陸羽仁
金融High Tea 舊文
