異動空間：震倉為走更遠路
隨著股民日益亢奮，首個震倉亦悄悄殺埋身，近兩日高追難免中伏，但如跟魏力建議將子彈分批使用，未來兩日股價將更吸引，屆時可再加碼入市。低位掃貨者賬面亦難免唔見一截，不少人心裏肯定在嘀沽：「早知高位食糊啦，家陣見財化水了！」但根據經驗，能夠在大牛市（不是上落市）仍可靈活走位，食盡每個波幅的人聊聊可數，高位沽咗，究竟邊個位先撈？撈早咗中伏又止唔止蝕？沽完隻股再升，究竟追唔追番？一路唔追一路升，到時又係後悔。既然震倉是為了走更遠的路，還是乖乖持貨坐到終點算了。
本月25日將是宏太控股（1400）大日子，上市一周年，按規定符合賣殼資格了！夠一年是否就要賣？當然不是，但跡象顯示宏太甚具賣盤的潛質或意圖。一、聯交所資料，上市僅7個月大股東就將21.42%持股，抵押予上海A股掛牌的山東鋼鐵，自己只剩6.28%，難免予人無心戀戰之感。二、掛牌以來根本無派過貨，十大券商持貨逾95%，唔使收集街貨隨時賣得。三、過去半個月低位成交持續異動，莊家搬倉過貨手影明顯，必有大動作跟尾！
魏力
http://www.facebook.com/2012jason
魏力
異動空間 - 魏力 舊文
