魚樂無窮：
賺錢靚殼七折大平賣
■慕詩國際老闆陳欽傑咁識炒樓，善價而沽呢個道理冇人夠佢清楚。 資料圖片
沙田第一城樓價升到飛天，呎價全部過萬，你買咗隔籬河畔花園，自然水漲船高。「唓！我買嚟自住嘅，有鬼用咩！」無錯，你一日唔賣，都唔會有錢落袋，但你阻止唔到河畔花園樓價跟住升。正如星爺喺
「回魂夜」所講，「七孔流血還七孔流血，死還死。」擺明係兩回事嚟嘅。
股票市場一樣，中港融合，殼股有價有市，以主板殼價5億計，未來呢個水位樓下嘅公司肯定絕跡。就算揸fit人冇意賣盤，但在市場調節機制之下，股價依然會自我膨脹。
今日推介嘅慕詩國際（130），就係最佳例子。眾所周知，慕詩主打女裝市場，業務遍佈中港，年年賺錢，更連續十多年無間斷派息。點解咁利害？睇番資產負債表，真相大白了︰手頭現金2.1億銀，零負債，每股含金量達四成，財務狀況健康到暈；每股NAV2.53元，現價1.86元，變相七折有售。
一隻往績咁好嘅股，有齊靚殼嘅條件，但市值竟然只得5億，十萬個不合理，就算唔賣殼，都冇理由大低水。再講，老闆陳欽傑乃炒樓高手，新近沽出太古城單位，輕輕鬆鬆執五球，善價而沽呢個道理，冇人夠佢清楚。佢揸住慕詩近七成股權，一個轉身就可以射個三分波，近期交投轉旺，小注買入博有消息跟尾又得，博追回差價亦得，得咗！
唐牛
https://www.facebook.com/tongcow88
唐牛
魚樂無窮 - 唐牛 舊文
