落後好炒
2015年04月28日
資金流入，港股再創七年高位，主調仲係繼續炒落後，最巨型嘅匯控(005) 都俾熱錢舞起，大市一度升成五百點，但個市升咁急，唔多唔少有回落壓力，去到尾市就稍回。
仲有一個星期唔夠，個市就去到五窮，但全球股市齊齊開Party，唔單止中港股市上升，美國
納指一樣創新高，南韓、日本股市都係。本來美國話六月加息，點知個市喺呢個時候風景最宜人，叫人難捨難離。有老股民話，每逢美國加息前，股市梗係要癲一鋪，之後就「冚包散」，佢估今次發生嘅日子係2016年。
大笨象投機炒住先
老股民嘅講法可以分開兩面睇，從淡嘅角度個市將來會跌；從好嘅角度就係仲有半年癲，半年時間對炒股來說已經係一個世紀。喺?家咁嘅市況，一日都嫌太長，半年之後會點無人會諗咁多啦！
股市只爭朝夕，?家股民同熱錢都係追逐不同概念同板塊，超巨型大落後股匯控終於發力。市場主要炒佢遷冊回港，匯控董事局話會研究註冊地點後，香港金融管理局表示歡迎，一唱一和即係搞到英國方面都幾肉緊，《金融時報》一日連續出幾篇報道同分析講呢個事件，大抵都係叫匯控諗清楚，質疑佢將總部搬返香港，不再受英國監管，令人擔心管治水平下降，不符合股東利益。
坦白講，股東最關心係賺錢同股價，監管係點係政府嘅事。匯控除了話研究搬家外，昨日仲傳佢會賣埋英國銀行業務或分拆，搞到炒風更盛。匯控行政總裁歐智華上場後，主要係開刀劈友減開支，可惜一直無辦法令股東滿意，搞到佢同主席范智廉個位都危危乎，?家兩人背城借一，大搞改組概念同玩埋財技，如果個市真係得，呢幾招或者好過可以坐喺度等炒。喺咁環境下，大笨象叫做發吓力殺番上來，正如我所講，投機炒咗先。
另外有報道指匯控擬出售英國零售銀行業務，又多一劑好消息。佢上周五已飆逾4%，昨日再攀升，收造76.45元，升3.6%，單隻匯控已為恒指貢獻113點升幅。我估佢短線繼續炒吓。同樣都傳話想搬的渣打(2888) 都走高2%，收造129.5元。
得益匯控發力，加上內地股市向好，推動港股再破頂。恒生指數高開185點報28245，午後升幅一度擴至528點，高見28588點，惟挨近28600有投資者沽貨獲利，大市升勢放緩，收市升幅收窄至不足四百點，恒生指數收造28433點，升372點；國企指數收報14741點，升252點，成交1909億元。
毫子股逐隻郁
有報道話中國政府正在研究將中石油(857) 與中石化(386) 、中海油(883) 與中國化工分別整合成更大的石化龍頭。中石油及中石化系被炒上。中石油、中石化升近7%，雙雙為表現最佳首兩位藍籌。收市後，中石油公佈，對媒體報道重組整合的猜測進行核查，至目前控股股東和公司均未得到來自任何政府部門有關上述傳聞的書面或口頭訊息。
石油系當炒，連同埋傳改組的航運股都有運行，個市炒落後，連埋好多股份飆咗上天，總之毫子股逐隻郁，識得逐瓣食的股民都幾好炒。
昆侖國際金融(8077) 公佈，相對2014年同期，預期截至2015年3月底季度的益及淨溢利將大幅增長，主要由於市場出現較大波動、較高的交易量、貨幣匯兌盈利及佣金收入增加帶動盈利增長所致，佢股價唔係貴，呢個盈喜消息都算來得合時。
陸羽仁
金融High Tea 舊文
