炒重組
2015/04/28 08:59:07
網誌分類: 經濟
內地股市回一回之後，在石油企業重組的預期升溫剌激下，再度發威，上證綜指大升134點或3%，一下子衝穿4400點及4500點，收報4527點，而港股則繼續炒高，恆指在匯控（005）連續第二日發飆帶動下，大升374點至28433
點，升幅1.3%：歐股亦唔執輸，其中德國股市升近1.9%，法國升1.3%。
受外圍帶動，美股朝早造好，但逐步回落，收市由升轉跌，不過全日走跌呆呆哋，變化唔大。杜指收市跌42點，收報18034點；標普500指數跌9點，報2109點；納指挫32點，收市報5060點。
內地央企重組愈炒愈熱，昨日油股、航運股、鋼股係咁升，都係與有關。以三桶油計，傳中石油(857)
和中石化(386)合併，中石油升6.7%，升到10.64元，中石化升7.2%，收7.63元，無傳重組的中海油(883)只升2.3%到13.42元。 油價大跌，其實油股業績好唔掂，收市後中石油公布第一季業績，首季淨利潤61.49億元，同比下降82%，創下其自2007年上市以來最差開局，每股收益0.03元。期內，中石油營業收入為4103.36億元，同比下滑22.4%。
中石油話，由於原油、成品油價格大幅下降影響收入同比降幅較大，導致業績大幅下滑。期內其煉油和化工業務虧損50.65億，銷售業務虧損25.9億元。中石油仲話，若2015年二季度價格水準延續低位運行，公司原油實現價格預期同比降幅較大，預計公司2015年半年度歸屬於母公司的淨利潤同比將發生大幅下降。
論業績三桶油好境未到，不過炒重組概念，愈否認愈升。睇嚟佢地將來難免重組，但未必咁快成事，所以唔好期望佢地好似南北車咁快搞出重組大計。
美股投資者比較審慎，主要係嚟緊呢幾日有比較多重要消息出爐，首先係蘋果公司昨日收市後派成績表，其次係聯儲局今日開始召開為期兩日議息會議，星期三會公布結果，而同一天，美國亦會公布第一季度GDP的初值報告。目前，市場已經排除咗聯儲局會於本月加息的可能性，所以預期今次的議息會議唔會有重大事件宣佈，特別係主席耶倫仲未安排舉行記者會。
不過，周三的議息聲明仍會給投資者提供儲局對於美國經濟現況的最新評估，一定程度會睇到儲局幾時會至開始加息的眉目。美國銀行美林分析師已預期儲局對經濟未來的展望，會較以前更加悲觀，意味著美國於6月開始加息的機會大大降低。
美企季度業績公布潮進入白熱化，今個星期會有5家杜指成份企業及1/3?標普成份企業派成績表，最受矚目的自然係蘋果公司啦。市場預期蘋果因為iPhone 6熱銷，業績會唔錯，股價在平常時段升1.8%至132.65美元。蘋果於昨日收市後公布業績，果然不負眾望，季度盈利每股賺2.33美元，好過預期的2.16美元，較去年同期增長44.4%；而營收580億美元，亦高過預期的560.8億美元，增去年同期增長27.2%！另外，蘋果主席庫克更宣布，將資本回饋計劃（capital return program）由此前宣布的1300億美元擴大至2000億美元，意味著蘋果將增加派息11%至每股52美仙。
至於期內的銷售，蘋果公司表示期內賣出6117萬部iPhone手機，高過市場預期的5726萬部，當中iphone 6及iPhone 6 Plus特別強勁。而iPads銷售1262萬部，就略低過市場預期的1394萬部；Mac電腦售出460萬部，亦略差過預期的464萬部。
至於市場方面，蘋果首席財務官Luca Maestri表示，中國市場銷售168.2億美元，以年計上升了71%！中國市場生意，佔了全球生意?29%，都咪話唔厲害！Maestri表示去季在中國增加了6間門市，令到門市總數增加至21間，預計至明年中，門市會增加至40間！庫克話，無論點睇中國市場，都係非常好，因為從未見過有一個地區有咁多新人加入中產階層行列！ 蘋果股價在昨日的延長時段再升1.2%至134.28美元。
陸羽仁
回應(0) 我想回應
陸羽仁 BLOG 舊文
