魚樂無窮：結好兩大條件追落後
■洪漢文任主席的結好控股，市賬率竟然只得0.7倍，大幅落後同業。 資料圖片
民生銀行（1988）旗下民生商銀擬全購華富國際（952），以每股作價1.38元計，相當於PB4.3倍，用正常市況計，呢個價絕對唔平，大時代下呢？答案係沒有最貴，只有更貴。經過呢單
刁後，券商股估值肯定升呢，噚日炒到飛天正常不過。
芸芸券商股中，唐牛獨愛結好（064）。兩個原因，第一，估值平！望清楚，結好爆升四成後，市賬率依然只得0.7倍，近排火箭式上升嘅英皇證券（717）同耀才證券（1428），市賬率分別係天價5.1同6.1倍，結好變相一折大平賣，係咁易將差價收窄，升幅講緊倍倍聲。
第二，供股後未炒過。「唔係喎，結好年初宣佈2供1，供股價只係0.28元，現價計升咗96%。」你睇睇行家先下結論︰英皇證券供股價0.5元，現價2.26元，升幅3.5倍；耀才供股價1元，現價4.93元，升幅3.9倍；申銀萬國（218）供股價2.342元，現價8.29元，升幅2.5倍。結好追番最落後嘅申銀萬國，要再升八成。兩個原因，一個結論︰炒！
同場加映招股中嘅滴達國際（1470），招股價0.6至0.8元，公開發售集資僅1,600萬元，炒味指數極高，當上限定價，市值只得奀豬6億，難怪首日招股孖展即超額18倍，新近上市、同樣細細粒嘅現恆建築（1500），累積升幅近六成，小注滴達博做其翻版，諗得過！
唐牛
https://www.facebook.com/tongcow88
唐牛
魚樂無窮 - 唐牛 舊文
