情陷夜中環：決戰富二代
■女士們想要嫁得好，基本上有兩個途徑。第一途徑嫁個富二代，又或找個踏實向上爬的男人。
嫁得好，說膚淺一點，就是嫁了之後，衣食無憂。要嫁得好，基本上有兩個途徑。第一途徑，嫁個富二代，或者如果你唔介意父女戀或爺孫戀，甚至乎可以嫁個富一代。
至於第二途徑，就是嫁
個今天仍然在踏踏實實向上爬，而他朝有機會變成富豪的男人。作為私人銀行家，我有責任提醒你，第一途徑和第二途徑會帶來不同結果，因為嫁娶也是投資一種，風險與回報自然成正比。
第一途徑，嫁個富二代：你冇乜風險，所以回報亦有限。冇乜風險，因為你必定一世無憂，坐嚇靚車去嚇旅行得閒收嚇禮物仔完全冇問題。但回報有限，因為富二代嘅身家亦有限。老竇未死，即係錢未到手；就算老竇死咗，都可能大把兄弟姊妹姨媽姑姐同佢分身家，最後分到幾多，富二代自己都未必知。
車靚極有個譜，旅行豪極有個譜，禮物仔都係貴極有個譜，嫁個富二代的回報有限，就是這個道理。仲有仲有，嫁個富二代，如果最後搞到離婚，你都應該分唔到佢一半身家。睇戲都有，同富二代結婚，通常都會要你簽份prenup，即係婚前協議。唔簽，冇得嫁；簽咗，冇得分，或者分好少。又係嗰句，回報有限。
「富二代」低回報 「向上爬」高風險
第二途徑，嫁個努力向上爬的男人：講得向上爬，即係你都要睇嚇佢爬到乜嘢位置。啱啱開始爬，冇家底靠自己，extreme cases可以係一個咖哩牛腩飯兩份食，仲要分兩餐食，去旅行諗都唔使諗，買本旅遊雜誌就當去咗。
你覺得個男仔叻、你覺得佢上進、你覺得佢能人所不能，全部都係「覺得」；就算你直覺再準，都要睇嚇經濟大環境，更加要接受呢個世界上有樣嘢叫一命二運三風水。
如果你的投資目標是「嫁得好」，把你的青春押在一個「努力向上爬」的男人，是一般 private banker也勸你不要做的極高風險賭博。
客觀一點分析，「富二代」低回報，「向上爬」高風險，應該點揀？葉朗程身為各位港女的private banker，當然會首先綜合你的身家、年齡、生意類別，進行一個全面的風險承受評估。不過唔使點樣評估都知道，港女一般嘅風險承受能力係比較低，而且大部份都冇乜大志，只要最後可以喺四季酒店擺番廿幾三十圍，再喺半山住個千五呎單位，佢哋已經覺得可以光宗耀祖。
既然係咁，very good，揀個富二代最好不過。但「富二代」絕對係一個競爭激烈嘅市場，唔係話有就有。作為private banker，我最能明白箇中辛酸。就算真係畀葉朗程識到個富二代，佢哋嘅家族資產其實一早已經畀其他private banker睇住，富二代根本冇話事權。
市場競爭大 家族多規矩
很多富二代，從來都是受制於家族的種種規矩的。滙豐銀行於兩星期前，在 Bankers’Club搞了個午餐聚會，差不多十圍枱。席上全都是企業的未來繼承人，而那次飯局，滙豐就請來大家樂主席陳裕光為這班繼承人分享企業傳承之道。
陳生指出，能夠在日本屹立超過二百年的企業，有超過三千家，但要在中國找出經得起二百年考驗的企業，竟然只有不出十家。企業傳承無疑是重要課題，但很多家族為此訂出奇怪規矩，就有點兒那過了。
好像我有個同事嘅client成立咗個家族委員會，每位家族成員當然希望能夠加入，藉以鞏固自己在家族的影響力。但要加入，則講「資格」。過咗某個年齡仲未結婚，唔入得；娶個老婆如果未讀過大學，唔入得；一旦離婚，影響家族聲譽，更加即刻畀人踢出嚟。連愛情都要關「錢」事，點解咁多人覺得做豪門少奶奶是一個童話故事？
高跟鞋故事反映愛情觀有異
剛看過一部戲，女主角的高跟鞋分別破過兩次。第一次弄破的時候，給富二代看到。隔天，因為富二代不知道女主角的雙腳大小，所以親自送了十對同款的高跟鞋到女主角的辦公室，對對唔同size，畀女主角試到啱為止。望著那十對高跟鞋，女主角很無奈。
女主角第二次弄破高跟鞋的時候，給另一個男人看到。這個男人見高跟鞋的鞋跟破了，就乾脆把另外一隻鞋的鞋跟也弄破，湊成一雙自家製的平底鞋。望著這雙平底鞋，女主角覺得自己後半生可以託付給這個男人。
女主角的選擇未必是對的，因為愛情觀根本不分對錯。拜金主義又好，浪漫主義又好，反正你是怎樣的人，就自然會被怎樣的人感動。
葉朗程
編按：〈利字當頭〉專欄逢周二至四見報，〈職場慧眼〉專欄逢周三、五見報，敬希垂注。
葉朗程
情陷夜中環 - 葉朗程 舊文
