魚樂無窮：恩達給你的炒股教訓
■恩達勁升兩倍，再由高位插足八成，整個瘋癲過程一日完成。 資料圖片
半新股恩達（1480）勁升兩倍變身紅底股，再由高位插足八成，整個瘋癲過程一日完成，成為股場茶餘飯後談論焦點。恩達招股價只得個零銀錢，近日三兩下手勢舞高至30蚊，相信當時問十個散戶，十個都
話唔會買。但如果由100蚊碌番落嚟50蚊呢？「嘩，平咗一半喎，好抵買！」呢啲肯肯定係上周五入場接貨嘅散戶心聲，無他，對佢哋嚟講，只有眼前數據可信︰一隻升咗幾倍、創30蚊新高嘅股，由於唔知仲有冇得升，對佢哋嚟講就係見頂，一隻跌咗一半、見50蚊嘅股，因為曾經見過100蚊，佢哋就會以反彈一倍做目標。如此心態，正中有心人下懷。
遇見過山車細價股，決定入場前，唐牛一定會問自己，隻股有冇投資價值。如何計算投資價值？不外乎市盈率、市賬率、息率，計一計安全網在哪裡，便可計到值博率。以恩達為例，每股盈利0.24元，每股NAV1.74元，假設股價30蚊，PE125倍，PB17倍，去到100蚊，PE417倍，PB57倍，大膽講句，投資價值係零！如果咁都要衝入火場，就只能轉mode用投機心態，贏幾多預咗輸幾多，風險與回報一樣高！不是嗎？好彩50蚊入場100蚊沽，一個上晝贏一倍，唔好彩60蚊買30蚊沽，一個下晝輸五成。老土啲都要講，食得鹹魚抵得渴，冇人逼到你入市的，除咗你自己！
唐牛
https://www.facebook.com/tongcow88
唐牛
魚樂無窮 - 唐牛 舊文
