抽水抽到腳軟
2015年05月13日
A熱港冷，昨日進一步浮面，今次仲變成內地股市上升，港股掉轉頭行。有解釋話係因為歐債危機受希臘影響惡化，令港股下午滑落，但講真希臘債務拖咗咁耐，係咪真係咁先？陸羽仁覺得，A股咁硬，港股咁軟，反映咗兩樣嘢，一係外資喺港股仲有影響力，佢哋睇淡，個市升時
俾佢哋拖慢，跌時俾佢哋加快；二係不少公司伸手集資，喺5月水量較少日子，就抽到個市無乜力。
內房股遲買無蝕底
港股近日集資活動頻繁，而且唔係二打六出手，好多都係有份量公司，好以早幾日日隻復星(656) ，雖然講到有雙馬認購，但股價都係要跌。跟住又有華潤置地(1109) 集資，消息講潤地伸手，臨門加碼到4億股，或者會以下限定價，配股集資97億元，潤地係內房股強者，股價比較高，係有條件發股融資，結果佢第一時間伸手，而且仲有啲多多益善嘅感覺。
另一間內房禹洲(1628) 同日透過華泰金融及海通國際，以每股2.2元至2.3元配售3.6億新股，集資約8億元，配售價較收市價2.51元，折讓8.4至12.4%，集資所得用於強化股本及增強市場地位。內房一日間大有大抽，細有細抽，可見不少公司都有興趣做吓抽水黨。
潤地係靚股，佢閃出來集資，對其他內房股都有壓力，中海外(688) 領跌藍籌，全日報29.5元，插3.6%。如果心水清留意下，恒大地產(3333) 急跌6.7%，報6.53元，已經低過上周四的收市價。
點解我會用上周四收市價嚟講呢？皆因上周四港股大插，當時我話調整未完，唔使咁急買嘢，後來上周五反彈，跟住內地減埋息，周日指數再升吓先。不過，內房股喺咁環境，回升力度都唔係咁強，到昨日插穿咗上周四個價。
由於潤地配售消息未完全消化，同時內房股普遍都有資金需求，一間抽開就有可能再有第二間，唔排除呢個板塊仲會插多浸，即係話係「低位」無撈貨，都唔係咁蝕底啫。
人行連續第三周暫停逆回購操作，外圍焦點落喺歐羅區財長會議結束，希臘債務談判未有達成任何協議，希債危機憂慮重燃，歐洲主要股市開市急挫逾1%，拖累港股反覆向下，恒指收報27407點，跌311點；國企指數收報13973點，跌209點，成交只有1364億元。內地股市升，香港股市跌，連國企指數都唔爭氣，成交減少下，證明抽水嘅殺傷力，如果要觀察個市係咪短期見底，一樣要睇吓批股活動，如果集資減少，證明企業管理層都覺得個市低，唔想再賣股住。
滴達食胡賺咗先真
喺咁嘅氣氛下，航空股借住油價受壓，逆市「起航」，國泰航空(293) 漲0.83%；國航(753) 升幅為國指成份股最大；同南方航空(1055) 齊升超過2%；最叻係東方航空(670) 漲3.6%。航空股負債重，但勝在個別已經發咗股集資，炒起上嚟少咗一瓣留意。
本港中檔瑞士製腕錶品牌的腕錶零售商滴達國際(1470) 公開發售超購838倍。昨日首掛，收市報0.97元，較招股價0.68元，勁升43%，不計手續費每手賺1160元。全日成交4.13億股，涉及金額4.54億元。
呢隻低調上市但超購爆燈的新股，高開1.16元，較招股價高70%；曾高見1.23元，接近升90%，收市已經係升幅收窄咗好多。滴達雖然超購咁勁，卻以低於中間價0.68元定價，集資淨額1.08億元，擺明係好炒，呢啲股份升咁多，無論邊個位食胡都無錯，總之最緊要係賺咗至為真。
陸羽仁
金融High Tea 舊文
