情陷夜中環：她，下凡了
■麥明詩散發那種氣質，可遇不可求。 資料圖片
有些人可能還會收看一年一度的香港小姐競選，但就算真是看，也最多是hea著看。咁啱開電視，咪指嚇笑嚇囉，睇嚇有冇「佳麗」跳跳嚇舞趴街，又期待會唔會有人輸咗之後搶咗司儀個咪然後大嗌「點解我咁靚都唔選我」。不過好朋友
Benson同我講，識睇，梗係睇「膝頭哥」。
睇前睇後，睇樣睇腳，甚至乎偏到睇腳趾，我都聽過，但鍾意玩膝頭哥，實在是聞所未聞。識你咁耐，都唔知你玩到咁偏喎，膝頭哥有咩美感？「冇美感㗎，個個膝頭哥都一樣㗎啦。」Benson和我離開浸會醫院，邊走邊說。剛剛有朋友踢波斷腳，要留院一天。
既然冇美感，點解要睇膝頭哥？「睇膝頭哥，係要睇嚇膝頭哥附近有冇瘀傷。」唔明。「十幾二十個港姐行出嚟，邊個膝頭哥有瘀，邊個就係冠軍㗎啦。」哦，我終於明佢想講乜。你哋就算唔明都好正常，因為唔正常嘅係佢，同埋我。有啲「家務」，女人會跪喺度幫男人做。
邊個肯上高層屋企，幫佢做「家務」，就係冠軍。講真，我真係唔信。就算跪喺度，都唔代表會瘀；就算瘀，都唔等於攞冠軍。亞姐可能會，港姐冇咁兒戲啩。
我冇咁變態，唔會睇膝頭哥。但如果要我提議一個特別環節給港姐，我一定提議「吃雞翼」。我很怕看見女人吃雞翼，因為我覺得世界上沒有一個女人可以高貴優雅地吃一隻雞翼。我講緊嘅係雞全翼，即係有雞槌有翼尖那種，仲要係滿佈豉油汁嘅瑞士雞全翼。如果有女人可以意態撩人地吃一隻雞翼，佢一定攞到港姐冠軍。
發夢都冇諗過自己會關心邊個係香港小姐，自從中三開始，冇扭開電視睇過任何一屆。可能會因為出街打邊爐然後間房咁啱有電視所以睇到，但係肯定唔會坐定定喺屋企專登睇。但係今屆，我想講，係已經同八個朋友約好咗，會專登喺金牌火鍋開間房，集中精神睇嚇最後後冠誰屬。點解今屆咁緊張？Ladies and gentlemen，in case你未知，等咗咁多屆之後，今屆港姐，終於有女神下凡。
麥明詩令人引頸以待
呢位下凡女神，叫Louisa，中文名麥明詩。Louisa，你唔使驚，Marcus哥哥喺度寫你，係要高度讚揚你，沒有惡意的。仲有，雖然我大你足足十年，但係我個樣其實好細個，同埋我每日都有敷mask，keep得好好，所以我堅持自己係哥哥，唔係叔叔。
首先我想同你講，我知你乖，唔會囂，但係恐防你真係會有少少自以為是，我要提醒你：其他參選的姐姐明顯輸最少五個馬鼻，即係擺明陪跑，但「完美」都係相對嘅形容詞，冇其他人襯托你，怎顯得你如此出眾？選美過程中，謹記，你仍然要無時無刻尊重其他人，因為最少她們有體育精神陪你跑。
今屆香港小姐，因為有Louisa，令人引頸以待。女拔萃，仲要係十優狀元，參選香港小姐？簡直係難以置信，Louisa小妹妹，你實在唔需要多謝TVB畀個機會你，而係TVB反而應該有個高層走出嚟公開多謝你畀個機會佢哋，等佢哋呢個無厘頭電視台嘅選美節目可以同「質素」兩個字掛到鈎。
女拔加劍橋無敵好款
女拔萃的舊生，我也認識幾個，最索嗰位，當然係我阿媽。「係唔係個個女拔都係你咁款？」我問媽。她很大反應，咩意思，我咩款呀？「好款，好似你個手袋咁好款。」阿媽的自信回來，說我也見過她的舊同學，「你話係唔係我咁款啦」。諗都諗到唔會同款，女拔有個款，但係七十年代嗰啲係一個款，廿一世紀又係一個款，女拔升港大一個款，女拔升劍橋又另一個款。如果仲要好似Louisa咁，劍橋法律系，無敵好款。
做女人做到女拔加劍橋，肯定唔只Louisa一個。一般嚟講，如果你用X-ray照一照呢啲女人塊面，你應該會見到個數字，yes，係個7字。讀書咁叻，唔係expect佢靚啩？Sorry，Louisa呢位小妹妹唔只靚咁簡單。高鼻大眼細嘴咪靚囉，有幾難？In fact，「靚」呢個字，太俗，整cheap咗麥明詩。
麥小姐散發著那種氣質，可遇不可求。有練氣功的朋友跟我說過，有啲人嘅磁場特別令人舒服，企喺呢啲人身邊練功，功力會特飛猛進。所謂氣質，大概就是這種磁場。更具體一點說，就好像馬騮搣和白雞冠的道理。兩種都是靚茶，馬騮搣香味濃鬱，好比一個有少少氣質的女人，但白雞冠那種醇厚回甘，直情是個渾身氣質的天使。睇今屆港姐，就係要睇天使下凡。
明詩，don"t worry about the chicken wings，就算你真係食雞全翼食到汙糟邋遢冇嚟貴格，我覺得全香港由三到八十歲嘅男人，都應該會爭住幫你抹嘴。
葉朗程
葉朗程
情陷夜中環 - 葉朗程 舊文
