滙海探戈：美元疑受打壓
美國聯儲局本周議息，息率料不變，由於7月會議冇記招，唔計下月嘅半年貨幣政策報告，今次係9月議息前，主席耶倫最後一次喺公開場合指點迷津，大家都想知道，加息猜謎遊戲仲要玩幾耐，9月加息機會高唔高。
儲局議息三要點
今次議息有三要點應留意，首先係息口指引。話曬美國近
期數據好番啲，尤其5月新增逾28萬個職位，耶倫今次究竟會繼續耍太極，重申今年加息但冇時間表，定吹風9月嚟料，係今次議息重中之重。
其次是，美國首季GDP負增長，儲局今次應該相應下調全年增長預測，通脹預測則可能跟隨油價回穩睇高少少，兩者都係儲局考慮貨幣政策嘅元素，具參考價值。最後一點，就是議息投票結果：過去三次議息理事們都係一致通過唔加息，以拉克為首嘅鷹派可能起哄主張加息。
環顧上周滙市，最震撼當然係新西蘭禮拜四爆冷減息0.25厘，且講明有需要會再減，拖累紐紙當日最多冧逾3%，上周五曾跌到69.43美仙，創近五年新低，且上周唯一報跌的主流非美貨幣。
值得留意的是，美國總統奧巴馬上周疑似出口術打壓美元，繼後日本央行行長黑田東彥則吹風話日圓跌夠，連世銀亦執國基會口水尾叫儲局今年唔好加息，從陰謀論角度，似為遏抑美元升勢做緊大龍鳳，連累美滙指數連跌兩周。
歐元上周雖跟大隊反彈1.4%，但歐盟對希臘賴皮態度的不滿溢於言表，有傳已諗緊plan B，姑忽論生定死，歐元短期仍會好chok。
奇兵
本欄逢周一刊出
奇兵
滙海探戈 - 奇兵 舊文
