中環在線：
丁蟹遇上陸叔 竟然唔講股
■陳永陸（右）喺馬場冇斬獲，卻成功捕獲鄭少秋。
雖然《大時代》上周五播完，但丁蟹魅力不減。飾演丁蟹嘅鄭少秋（秋官）噚日現身馬場，遇上股評人陳永陸（陸叔），兩人竟然冇講股票，亦冇提秋官效應有幾靈，只係寒暄幾句。查實兩人應該交換護膚心得喇，年過60
都保養得咁好，容光煥發！
噚日沙田馬場跑馬，第8場係太子珠寶鐘錶精英盃，贊助商搵咗一大批嘉賓到場助興，又頒發第6屆「太子珠寶鐘錶精英獎」，近排因《大時代》重播而人氣急升嘅秋官都係得獎嘉賓之一，而陸叔就負責同場一個講股環節。
■（左起）金利豐老闆朱沃裕、朱李月華、四太梁安琪同場齊睇馬仔。 陸叔追睇《大時代》
丁蟹與陸叔相遇，當然要嚟個合照喇。睇資料，秋官大過陸叔5年左右，今年68歲，陸叔就63歲，但兩位腰板挺直，神采飛揚，一睇就知養生與護膚得宜，恨死唔少男士呀。
陸叔話，佢多年前喺電台節目訪問過秋官，過去兩個月，好多人半夜追睇《大時代》，佢都唔例外。佢上世紀90年代初入行做證券行，1992年《大時代》首播時已經晚晚坐定喺電視機前面收睇，近日重播亦唔放過，起碼睇咗三十幾集。
咁𠵱家睇番有冇發覺劇中有咩地方唔合邏輯呢？一向處事圓滑嘅陸叔即刻笑笑口話，「今次用欣賞角度去睇，情節有少少誇張啫」。
咁都啱嘅，睇電視啫，又唔係落場炒股票，股民追完劇，最希望「秋官效應」拜拜，港股唔好維持上落市格局，快啲重拾升軌。陸叔都話得呀，恒指有機會挑戰三萬點，不過冇咁快囉！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
