魚樂無窮：建制離場如莊家散水
■梁振英指，建制派42位議員過去毫不動搖地支持政府方案。 資料圖片
政改否決屬意料中事，冷不防建制派人急智生玩離場，但部份隊友唔上心，最後竟變成大比數票反對政改議案。王朝酒業（828，8票支持28票反對）復牌無期，長盈集團（689，不解釋）怒插逾一成，所
有嘢冥冥中似有主宰。
散戶對莊家股又愛又恨，無他，升時棚氣十足，夠快夠狠嘅話，同印銀紙冇分別。不過，散水時亦同樣凶狠，可以沽到體無完膚。不少莊家股能夠成功收集、砌上再派貨，說穿了都係兩個字︰秩序。首先，各路人馬低位收集及砌上時要有秩序，唔可以偷食，務求在貨源歸邊下，用最少成本將股價有咁高舞咁高。食糊呢？同樣要有秩序，大家一味鬥沽，市場購買力好快會用盡，七除八扣隨時冇肉食，公司仲要永不超生。所以出貨時一定要一浸浸，托下又沽下，先至有大魚上釣。
梁振英話，建制派42位議員過去一直十分穩定、毫不動搖地支持政府方案，唐牛對此十萬個同意，佢哋盡力將「大部份市民」、「主流意見」扭曲為支持袋住先，實在功不可沒，如同將冇業績、負債高嘅垃圾股托高。最後一刻，幕後大佬滿以為成功之際，點知建制竟毫無層次離場，等同將所有買盤抽起兼鬥掟貨，人踩人之下，血流成河了，蛇齋餅糉白費了。
一句到尾，股壇與政壇，等埋邊個都冇用，最緊要有秩序。
唐牛
https://www.facebook.com/tongcow88
唐牛
魚樂無窮 - 唐牛 舊文
