魚樂無窮：資金避險哪類股受惠
■恒指昨日一度急瀉1,000點。 朱永倫攝
中港股市大玩跳樓機，尤以午後最為恐慌，滬綜指4000、3900兩關連環失守，恒指因而一度急瀉1,000點，出現人踩人場面，雖然收市喘穩，但元氣已經大傷。好多戰友都會問，阿爺減息降準雙管齊下，點解都頂唔住？無他，
A股用一年時間由2000點炒上5000點，全憑兩個字︰孖展！
單計上海股市，孖展額由4月份起狂飆五成，證明大媽越升越買、越賭越大，還未計用一蚊本錢買五蚊貨嘅傘形信託及配資。
如今股市由高位急墮，冇錢補倉者惟有斬纜，結果造成越跌越掟、越掟越跌嘅惡性循環。創業板指數由高位唔見三成有多，就知泡沫有幾癲，相信唔少炒友焗住沽重磅股甚至港股，班資回朝救亡，因而形成火燒連環船局面。可以預期，放水短期不足以托住股市，要待孖展完成拆倉，股市才可重新上路，現階段只能夠等。
個股方面，高息股有望成為資金寵兒，你睇主力經營西隧及駕駛學院嘅港通控股（032）逆市破頂，就知避險情緒十分高漲。置富（778）由高位回落14%，近日大冧市下成功免疫，睇真啲，原來息率已逼近6厘，防守力一流，旗下商場不斷翻新，加上新收購嘅麗港城商場，大有加租能力，市賬率只得0.65倍，比起領匯（823）平近三成，絕對值得趁跌市吸納。
唐牛
https://www.facebook.com/tongcow88
唐牛
魚樂無窮 - 唐牛 舊文
