考完膽汁考實力
2015年06月30日
6月港股真係幾絕吓，臨近半年結，全球股市大插，先係內地A股爆災，跟住到希臘佬可能賴債，搞到亞洲股市全面滑落，美股期指都軟晒。放假期間阿爺打出減息降準的組合拳，內地股市開市一度企穩有升，但希臘佬搞一搞局，宣佈資金管制，A股最後都頂唔順外圍壓力又插
過，恒指最多大插1046點，最後跌幅稍為縮窄收市。
風高浪急下，逆市買嘢考完膽汁，都開始考驗吓大家荷包嘅實力啦。我一向唔贊成人借錢買股，呢啲時勢，借孖展買完貨佢再插，你真係有得震無得瞓。
中央雖然連出兩招救市，但淡友都有兩大殺着對抗，唱衰A股泡沫就爆在前，借希臘危機整低個市在後。中環茶友話，上個星期摩根士丹利向客戶發出建議，調低A股目標區間，由上證綜指原先睇2015年底睇4000至4800點，調低2016年中在3250至4000點間浮沉。
大摩睇淡理由好簡單，包括新股大舉上市增加供應、經濟差削弱盈利增長、估值偏高同埋孖展問題，結果上星期摩笛一奏，內地股市就連跌兩日，茶友笑話，你話佢勁又好、幸運又好，總之呢次就俾佢攞晒彩。
大摩唱淡內地股市食到正，點講都有好運喺裏頭，因為內地個市喺央媽護牛之下，昨日開市本來定番一定，但港股受到希債惡化帶頭插落去，止唔到血，變成今次內地股市被港股拖番落去，無辦法借住中央出招反彈。
港股曾跌過千點
六絕魔咒惡過雞，上證綜指收跌3.3%，收報4053點，但係日中曾插低至3875點，最低插過7.6%，之後有傳內地正考慮暫停新股上市，內地證監會稱融資融券業務風險總體可控，所以後段都彈番一半，夾硬收番起4000點樓上，唔知阿爺有無暗中發功。
港股失守一百天線(26183點)後跌勢轉急，午後更大跌1046點，低見25617點。內地股市後段跌幅顯著收窄，最終恒生指數收造25966點，跌696點；國企指數收報12694點，跌393點，成交由上周五的1513億元，增加至1861億元。
藍籌股近乎全軍覆沒，騰訊(700) 與工行(1398) 為跌市火車頭，兩股質低恒指224點。騰訊跌6.8元，造153.1元；工行除淨下滑0.176元，造6.1元。聯想控股(3396) 首掛，收造42.95元，比上市價微跌0.03元；旗下聯想集團(992) 挫5.7%，為表現最曳藍籌。
港股急插因希債危機和A股下滑兩大死因，希債問題相信喺7月5日公投前，市場會打定輸數，逐步反映佢脫鈎嘅風險。
傳內地停新股上市
至於內地情況，阿爺似乎全方位撐市，首先澄清話場內和場外融資(孖展)並無天量平倉，中國證券金融公司指出，目前證券公司融資融券業務風險總體可控，融券強制平倉的規模很小，壓力測試表明，在目前市場情況下，融資融券業務整體維持擔保比例仍然遠高於預警線，滬深兩市25至26日兩個交易日因維持擔保比例低於130%而強制平倉金額不到600萬元，風險仍然可控。
證金公司又提到場外活動作出評論，話滬深兩市近兩個交易日場外孖展強制平倉金額不超過40億元，今天上午強制平倉規模約22億元，合計佔交易量的比例很小。我睇完證金公司呢個講法，同外界吹水話有過萬億場外融資要強制平倉，好似差距好大。
喺呢啲波動市，無實力無持貨能力的人好難買股，因為市況太chok，要預咗希臘脫鈎的尾浪風險，膽子小或財力弱者，都係睇吓就算啦。
陸羽仁
金融High Tea 舊文
